Ha kine ki shi snem tam la don mo ki chargesheet ba la sei pyrshah ïa ki jingtreikam ki EC barim?.

Ka elekshon ban jied ïa U MP, ba thymmai jong ka Shillong Lok Sabha Constituency, ka la nang hajan eh bad kumta ka la dei ruh ka por ïa ki seng saiñ pyrthei bad ki nongïalam jong ki, ba kin leh juh leh jan ïa ki paidbah ba kin ai ka jingkyrshan kaba khlaiñ, na bynta u kyrtong jong ki.
Hynrei haba shu peit na ka jingjia ha ka sngi palei, da ka jingleit tur u paid ka Hima Sohra sha ophis ka Khasi Hills District Council, ka pyni syier shibun pynban ïa ka seng, kaba bat ïa katei ka shuki ha ki ar snem ba ladep, ba kan lah ban ïa tyngkhuh jingeh ban ïoh ïa ka jingkyrshan kaba khlaiñ na u paid ka Hima Sohra, uba don ka jingkhmih lynti ban ïoh noh ïa la u syiem ba pura.
Haba peit ha ki ar tylli ki elekshon ba la dep, lada dei ka MP lane ka MDC, la ïohi ba ka seng VPP, kaba synshar ha Khasi Hills District Council, kam shym duna satia ki vote jong ka na Sohra Constituency, ha kaba u kyrtong MP jong katei ka seng, ula jop donburom na katei ka Consttituency bad sa u kyrtong MDC, u shu shah rem salit ha ka jingïaleh, ha u snem 2025, hynrei da ka jingleh mynthi jong ki bad ba kim shym la rai satia ban jied ïa U Syiem ba pura ha katei ka Hima, la ïohi, kumba kan mih ka jingthut ha ki jingïalang paidbah jong ki sha katei ka thaiñ bad wat ïa ki vote ruh kumjuh, ha kaba kito kiba kwah Syiem ha katei ka Hima, kin lah ban kyrshan noh sha kiwei pat ki seng, kum ka jingsngew bitar bad sngew kput ïa ka seng u Prah.
Khlem pat da ïa rung ïa ki riti ki dustur, kiba don ha katei ka Hima, hynrei katba ka long, ka dei ka kamram jong ka KHADC ban jied mardor ïa u syiem ba pura jong ka Hima Sohra bad lada ka ïaid ha kano kano ka dur ruh, ka don ïa kiba khraw jong katei ka Hima, kiba ka dei ban ïa syllok ban pynurlong mar mar ïa katei ka kam, haba shai haba shit bad khlem da don ka jingpeit sniew ne peit matsuh ïano ïano.
Ha kine ki shisnem tam, ka EC jong ka VPP, ka pyni ïa ki kam ïa pyni bor jong ka bad u paidbah, lada dei ha Raid Tynring, ha ka Hima Langrin bad kumjuh ha ka Hima Sohra bad lait nangta, ngim shym la ïohi satia ïa kiwei pat ki kam, ba kan pynïapher ïalade na ka seng UDP bad NPP bad ngi ju kynmaw ba ki heh jong katei ka seng, ki kren ban jynrat naduh dyngkhong ïa ka jingbamsap, hynrei ha kine ki shisnem, kim shym la sei satia tang kawei ka chargesheet pyrshah ïa ki EC kiba rim bad katei ka pyni, kumba u dang khlaiñ bor da U Comptroller General jong ka sorkar India, ha kaba u sei madan da ka jingthoh kaba shai, halor ki kam jyrsieh ha katei ka KHADC, katba kine pat kiba la kren paidbah ha shwa ka elekshon, halor katei ka thong, hynrei kim lah ban sei wat tang shi laiñ ki jingshisha halor ki kam bamsap, kiba la jia ha katei ka Council.
Kumta halor kane uba bun ruh u paidbah u la sdang pynban ban ïohi ba kine ki MDC jong ka seng VPP imat kim long laitluid satia ban trei ïa la ki kam khlem da ïoh ka jingai dak ne jingaibor jong u Nongïalam jong ki.
Kawei na ki mat ba hakhmat duh kaba dang shudep ïakren kadei ka kaiphod jong ka bhah thungkam thungjam ka jylla ne ka State Reservation Policy kaba la dep khot jingïalang jong ka Sorkar ia baroh ki seng saiñ pyrthei ha kaba dei tang ka seng VPP ka khlem leit ïashimbynta sha katei ka jingïalang.
Ki briew kiba la sdang ban pynpaw shuh shuh ka long ruh halor ka jingpynlong ïa lap elekshon MP kaba shiteng samoi ha kaba kane ka seng ka ïalap sha ki district naba ha jaka ban pynpaw bad pynsngew ïa la ki jong ki mat hynrei ka long pynban da kumwei pat.
Kumta mynta kan beit hi ha u paidbah shano un noh ka mynsiem naba kiba la ïeng ïakhun elekshon kin dei beit ha ka kyrdan Doctorate ne Ph.D.