Kynnoh u Bah Sniawbhalang ba leh politik ka VPP halor ka mat Reservation Policy

Shillong, Jymmang 8 : U Symbud Myntri Rangbah bad National Vice President ka NPP u Ma Sniawbhalang Dhar ha ka sngi Thohdieng ula kynnoh ba ka Voice of the People Party (VPP) ka la pyni shai kdar ba ka “ïalehkai politics’ bad ka mat State Reservation Policy, haba kdew ïa ka jingpep jong ka ban wan sha ka jingïalang jong baroh ki seng saiñ pyrthei kaba ka VPP hi dalade kala dawa tyngeh.
“U Myntri Rangbah ula jubab shai bha hynnin ka sngi. Nga pynpaw ïa kajuh ka jingsngew kumba la pynpaw da u Myntri Rangbah halor kane ka kam” ong u Ma Sniawbha haba kylli halor ka jingpep ka VPP sha ka jingïalang ban ïakren halor ka kaiphod jong ka State Reservation Policy.
Haba ong ba kane ka jingbym wan pyni durkhmat kum ka kam kaba sngewsih, ula ong ‘Ka long kaba sngewsih ban ïohi ba kane ka party (VPP) kaba dawa tyngeh ban khot ïa ka jingïalang jong baroh ki seng saiñ pyrthei, kala pep pat dalade ynda la dei ka por”.
U la ong “ U Myntri Rangbah u Conrad K Sangma kumba u la kular hapoh ka ïing Dorbar Thawaiñ ban khot ïa ka jingïalang jong baroh ki Seng Saiñ Pyrthei te u la pyndep ïa ka kular katba kine kiba ïakhih ha surok kiba dawa hapoh ïing dorbar ki pep ynda la dei ka por”
Haba kylli la ka VPP ka leh politics ïa kane ka kam, u Ma Sniawbha ula jubab “Phi kren ïa kaba dei eh. Ka paw ba ki shu kwah leh politics namar kim shym la pyni ïa ka jingshimkhia shisha ïa kane ka kam”.
Ula ban jur ba ka Sorkar kala pynurlong ïa ka jingdawa jong ka VPP hynrei kane ka Party dalade kala pep ban wan mihkhmat.
“Kat kaba long hi, u Myntri Rangbah ula khot ïa ka jingïalang jong baroh ki seng saiñ pyrthei kaba la dawa khamtam da ka VPP hapoh ka ïing Dorbar Thaw Aiñ. Kae ka pyni ba ka VPP kam don satia ïa ka jingmut ba shisha ne ka jingsngewkhia ba shisha ïa kane ka mat” ula ong.
Kane ka jingïalang jong baroh ki seng saiñ pyrthei ka dei kaba la pynlong ha ka sngi Ba-ar kaba ïakren ïa ka kaiphod jong ka Expert Committee halor ka State Reservation Policy.