Sdang ka tamasa ñiangtaser ha Ïewsier, ïaroh u Myntri ïa ka jingphylla kitei ki jait khñiang

Nongpoh, Jymmang 08: Ka tamasa ñiangtaser Festival kaba dei ka tamasa ban pynpawnam ïaki jingkhñiang kiba la ju tip kum ki ñiangtaser kiba ju mih shisien haka 4 snem shuwa ka World Cup Football kala sdang mynta ka sngi ha Iewsier haka shnong Saiden Ri-Bhoi District, ryngkat ki prokram bapher bapher naduh ka phutbol, ka rwai ka siaw, ka ïakop khwai ban sa pynlong haki 2 sngi lynter kata haka 8 bad 9 tarik Jymmang 2026.
Ïa kane ka tamasa la pynlong da ka Ri Bhoi Tourism, Environment & Development Forum (RBTEDF) ryngkat ka jingïatreilang bad ka Dorbar Shnong Saiden bad la wan ban plie paidbah mynta ka sngi da u Bah Sosthenes Sohtun Myntri ka tnad C&RD ka sorkar jylla kum u kongsan haka jingdonlang u Dr Celestine Lyngdoh MLA ka Umsning, u Raja Brahma ADC ka Ri-Bhoi, Akash Marak Assistant Commissioner, Bah EJ Myrthong Rangbah Shnong ka Saiden, Bah Plielad Tiewsoh Chairman ka RBTEDF, Dr. Rodeson Thangkhiew of USTM nonghikai ka USTM, Prof HJ Syiemlieh nonghikai barim ka NEHU bad kiwei kiwei.
Na ka liang u Bah Sosthenes Sohtun kum u kongsan haba kren ha kane ka sngi u la pynpaw ka jingsngewkmen ban don bynta ha kane ka tamasa namar ka dei kaba kham kyrpang halor ka jingdon kitei ki jait khniang kiba ju mih shisien ha ka 4 snem shuwa ka world cup, ha kaba ki paidbah la kum ka ïew ki rung sha ki khlaw ki btap ban leit jied bad tam ïa kitei ki jait khñiang kiba phylla bad kiba la ngeit ruh ba kidei ki jait khñiang kiba shngiam ban bam bad kiba tei ïaka met.
U la kyntu ruh ïa ki paidbah namarkata ka long kaba kongsan ban pynneh pynsah ïaki khlaw ki btap ban sumar ïaka mei mariang namar u Blei u la kyrkhu shikatdei ïaki jingdon jingem.