Ka Shree Cement kam pat ioh NOC, pat ioh Mining Lease na ka tnat Forest-JHADC

Khliehriat jymmang 7: Ki paidbah nongrep kiba na Shnongrim, East Jaiñtia Hills District kiba shah ktah na ka daw ka jingkam trai ka company Shree Cement Ltd, ïa ki jaka rep, ha ka jingbuddien, ki nongrep ki la lap shuh shuh ba ka company Shree Cement Ltd kam pat ioh satia ïa ka syrnot No Objection Certificate (NOC) na ka tnat (Forest) jong ka Jaiñtia Hills Autonomous District Council (JHADC) kaba long syrnot kaba donkam bha na ka bynta ka Prospecting License bad ban tih mawshun, namar ka company ka thmu ban khlong ïa u mawshun na Lum Syrman, ki paidbah nongrep kumjuh ruh ka tnat Forest jong ka JHADC ki dawa ba dei ban pynsangngeh noh mardor ïa ka public heairng kaba thmu ban pynlong ha ka 22 tarik mynta u bnai jymmang 2026 ha Lum Shyrman elaka Nongkhlieh.
Na ka liang ki nongrep ki la ong “Ngi ki nongrep kiba dei ki nongshong shnong jong ka Shnong Shnongrim bad ngi dei ruh ki trai jaka jong ka dong Lum Syrman ba hapoh ka Elaka Nongkhlieh, East Jaiñtia Hills District, ngi pynpaw paidbah ba ngi pyrshah jur bad ngi dawa ba dei ban pynsangeh noh mardor ïa ka Public Hearing kaba la thmu ban pynlong ha kaba Ïadei bad ka Mining jong ka M/s Shree Cement Limited. Kane ka jingdawa jong ngi ka long namar ba ka company Shree Cement limited kam pat ïoh ïa ka No Objection Certificate (NOC) na JHADC”
Ki la iathuh ruh ba katkum ka shithi jingpynbna kaba myn ha ka 27 tarik u bnai iaiong 2026 ba la pynmih da ka bor ba dei peit na JHADC, la pynshisha ba ka tnat Forest jong ka JHADC kam pat ai ïa kane ka NOC sha ka company Shree Cement ba kan khlong ïa u mawshun na Lum Shyrman, ki la ong ba lada pynlong ïa ka Public Hearing khlem pat biang ki kot ki sla bad khlem pat ioh jingbit na ka tnat ka paw ba ki bor pyniaid public hearing ki khlem khlem bud ryntih ïa ka rukom kaba dei kaba ki dei ban bud bad ka long ruh ka public hearing kaba beaiñ. Shuh shuh, ki la ong ba kine ki jaka ba thmu ban leh ïa ka ïa ka ne ka mining ban khlong ïa u maw shun ki dang dei ki jaka jong ki nongrep kiba na Shnongrim, kiba im na ka rep ka riang, kumta ki la ong ba ym dei satia ban leh ïa kano kano ka kam khlem ka jingmynjur lang ki trai jaka.
“Ngi kyrpad jur ïa ka Meghalaya State Pollution Control Board (MSPCB) bad baroh ki bor ba dei peit ba kin pynsangeh noh mardor ïa ka Public Hearing haduh ba ka kompani kan da lah ban pyndep lut ïa kiei kiei baroh ki jingdonkam kiba katkum ka aiñ, namar ngi ki nongrep ngi ieng ha ka nongrim ba ngi iada ïa la ka jong ka hok long trai jong ngi ïa ki jaka ha shnong ha thaw” ong ki nongrep na Shnongrim.
Shuh shuh ruh, wat na ka liang ka ophis Forest lyngba u Chief Forest Officer jong ka Jaintia Hills Autonomous District Council, u bah F.Blah lyngba ka shithih ba u la phah sha u Chariman & Member Secretary jong ka Meghalaya State Pollution Control Board myn ha ka 4 tarik u bnai jymmang 2026, u la dawa na ka tnat ba ka dei ban pynsangeh noh mardor ïa ka public hearing jong ka company Shree Cement Ltd bad pynpaw ba ka jingdawa pynsangeh ka dei namar ba ka company Shree Cement kam pat shym la ioh ïa ka syrnot NOC na ka tnat Forest (JHADC).
Ïa ka shithi ba la phah sha ka Meghalaya State Pollution Control Board (MSPCB), u Chief Forest Officer jong ka Jaiñtia Hills Autonomous District Council, u la ai copy ruh sha u Chief Executive Officer Meghalaya Investment Promotion Agency , Main Secreteriat Shillong, sha u Commissioner & Secretary Planning Investment Promotion and Sustainable Development, Secreteriat Shillong kumjuh ruh sha u Joint Secretary Planning Department and Joint CEO MIPA ban long kum ka jingpyntip ba kin dup tip ba ka Shree Cement kam pat ioh ïa ka NOC na ka tnat Forest jong ka JHADC.