Shillong, Jymmang 07 : U Symbud Myntri Rangbah ka Jylla ba peit ïa ka tnad Kampohiing, Bah Prestone Tynsong u la kyntu ïa ki paidbah khamtam ïa ki nongkhaïi kiba shah dawa pisa ba kim dei ban shu sngap hynrei ki dei ban ujor da ka ejahar lane ban pyntip sha ki bor sorkar.
Ha ka jingïakren bad ki lad pathai khubor, u Symbud Myntri Rangbah u la ong ba kino kino kiba ïoh pdiang ïa ka jingshah dawa pisa ki dei ban ujor mardor da ka ejahar sha ki police station, outpost lane wat sha district police headquarter. “Lah ban pyntip shangi ne shanga ruh namar ngi don hangne ban buddien ïa ka,” u la ong da kaba bynrap ba ka dei ka thong jong ka sorkar ban pyntikna ba baroh ki nongshong shnong kynthup naduh ki nongkhaii ba kin don ha ka jingshngain.
Ha kajuh ka por u kyntu ruh ïa ki paidbah ba kim dei satia ban tieng ïa ki kynhun ba dawa pisa. “Nga kwah ban kyntu ïa ki paidbah ka jylla ba kim dei ban tieng namar ngi don lang bad lada jia ba phim pyntip ïa kum kine ki jingjia shangi, ngi ruh ngin shem jingeh,” u la ong.
U Symbud Myntri Rangbah u la ïai ban biang da kaba ong ba lada dei ki kynhyun kieng atiar lane ki nongtuh lane ki nongkam bymman, ki paidbah kim dei satia ban tieng namar ka sorkar ka don bad kan leh da kaba tyngeh ïa ki.
