Sngew kmen ka SMC ïa ka mang tyngka ba T.70 lak tam na ka bynta ka L.P. School Deiñsatlang EJHD

Khliehriat jymmang 07: Ka School Managing Committee jong ka L.P. School Deiñsatlang, East Jaiñtia Hills District lem bad ka shnong hi baroh kawei ka pynpaw ka jingsngewkmen ïa ka jingpynbna ka sorkar ïa ka mang tyngka kaba T 70,18,887 (Hynñiew phew lak khadphra hajar, phra spah phra phew hynñiew tyngka na ka bynta ban pynheh ne shna shuh shuh ïa ki kamra klas na ka bynta ki khynnah skul bad ong ruh ba kane ka skul naduh u snem 1966 kam pat ju iohlad ban shna ïa ki kamra klas kiba thymmai bad ki nonghikai ki la shu pynlong la ka pynlong klas bad ai jinghikai ïa ki khynnah hapdeng ka jingkhapngiah.
Ki bor pyniaid skul ba kynthup u Head Teacher u babu Dipsingh Nongtdu uba dei ruh u Secretary jong ka School Managing Committee, ka SMC hi baroh kawei lem bad ki nongpyniaid shnong kiba na shnong Deiñsatlang ki la ai ka jingkhublei sngewnguh bad sngew burom ïa ka sorkar MDA-2 ba la lam khmat da u myntri rangbah, u Conrad.K. Sangma, kumjuh ruh ïa u M.L.A Khliehriat uba dei u MLA ka thaiñ, u bah Kyrmen Shylla kumjuh ruh u myntri sorkar uba peit ïa ka pule puthi hapoh ka jylla, u bah Lahkmen Rymbui kiba la pynioh ïa ki lad ki lynti da kaba pynbna ïa katei ka mang tyngka kaba T 70 Lak tam kaba na ka bynta ban pynbit pynbiang ïa ka skul Lower Primary kaba don hapoh shnong, ka SMC ka la pynpaw ruh ba kane ka skul mynta ka la khapngiah bha ban shong ki khynnah skul bad ha ka por ba long skul ki khynnah ki hap ban shu ïa shong klas sa hapoh iing Community Hall ruh, kane shisha ka la buh jingeh bha ïa ki nonghikai bad kumjuh ruh ïa ki khynnah skul khamtam lada jia ba don kino kino ki kam shnong ba ka shnong ka donkam ïa kane ka ïing community hall.
Lyngba ka jingthoh ba la buh hakhmat u bahut Kyrmen Shylla, u M.L.A. ka thaiñ, ka School Managing Committee ka la kyrpad biang sa shisien ïa u M.L.A ba un sngewbha ban ialeh shitom ban iarap shuh shuh sa ha kiwei kiwei ki kam ruh kiba dang duna hapoh kane ka skul kum kaba thung nonghikai thymmai shuh hapoh kane ka skul namar ka jingpynrung kyrteng ne enrolment ki khynnah ka kiew bha katba nang mih ki snem “Ka SMC ka shaniah bad ngeit skhem ba phin pynurlong ïa kane ka jingangnud jong ka skul bad ka shnong baroh kawei, khublei shibun eh M.L.A (Kyrmen Shylla) ïa ka jingiarap basbun jong phi bad ngeit skhem ba phin nanglah ban nang ai shuh shuh ki jingshakri kaba bha tam ïa ngi bad ïa ka ri, ka jaitbynriew hi baroh kawei” pynkut u kyrwoh na u Chairman ka SMC jong ka L.P.School Deinsatlang, bah Joplin Pohthmi.