Shillong, Naitung, 16: Ar ngut ki samla Khasi ki la hap ban thiah haduh ar miet kynthih ha Steshon Rel ha Delhi hadien ba ki la phet na kawei ka jaka ba la ïalam da ki nongkular aikam ha Delhi.
Ïa kine ki arngut ki samla la pyllait im da ki dkhot jong ka KSU Delhi Unit kiba la leit ban ai jingïarap tang shu ïoh jingtip halor kane ka jingjia.
Katkum ka jingïathuh jong ka President ka KSU Delhi Unit ka samla Marbiang Khongwir, kine ki ar ngut ki samla Khasi ki wan leit Delhi na ka bynta ban trei kum ki Security Guard ha kawei ka kompeni kaba la tip kum ka SSA Security Firm kaba dn ha Anand Vihar, Delhi. Hynrei kine ki arngut ki la shah thok pynban ha kane ka kompeni kaba thmu ban ai kam ïa ki.
Ka la ïathuh ynda kine ki arngut ki samla Khasi ki la poi ha Anand Vihar la ïalam ïa ki sha kawei ka jaka kaba kham kyndong ha kaba ki nongaikam jong ka kompeni ki la kam ba ka dei ka jaka treikam.
Kine ki arngut ki samla kiba la ipher haduh katta katta ïa ka jinglong jingman jong ka jaka ki la phet krad bad leit thiah miet ha Steshon Rel haduh ba ki dkhot ka KSU kin wan pyllait im ïa ki.
