Ym don jingïapher jingmut hapdeng ki Party halor ka kaiphod Reservation Policy

Shillong, Jymmang 6 : Ki Seng Saiñ Pyrthei ka Jylla ha ka sngi Balang, ki la ïoh ïa ka jingbatai halor ki jinglap ba kongsan jong ka Expert Committee on State Reservation Policy ha ka All Party Meeting ba la pyniaid da u Myntri Rangbah ka Jylla u Conrad K Sangma. U Myntri Rangbah ula ong ba ki seng saiñ pyrthei kim shym la pynsngew ïa kano kano ka jingïapher jingmut halor ka kaiphod ka Committee.
U Commissioner & Secretary Bah Cyril VD Diengdoh ula ong ba ïa kane ka jingïalang la pynlong hadien ka jingkular jong u Myntri Rangbah hapoh ka ïing Dorbar Thaw Aiñ, ha ka por ba wanrah ïa ka kaiphod ha ka 18 tarik Rymphang, 2026.
“Ha ki jingïakren ïa kane ka mat, u Myntri Rangbah ula kren hapoh ka ïing Dorbar Thaw Aiñ ba yn sa khot ïa baroh ki seng saiñ pyrthei ban pan ïa ki jingai jingmut jong ki bad ka jingïasyllok bad ka jingwanrah ïa ki jingshem jong ka kaiphod” ula ong.
Ka kaiphod, kaba don haduh 21 valume ba jan kot 4000 sla, la dep ban sam sha baroh ki MLA, ong u Bah Diengdoh.
Ha ka jingïalang ba long ha ka sngi Balang, ïa ki jingshem bad ki jingai jingmut ba kongsan jong ka Committee la pynsngew sha ki seng saiñ pyrthei bad la ïakren halor kine.
U ïathuh ba u Myntri Rangbah ula bthah ban ai ïa ki kopi jong ka kaiphod sha baroh ki seng saiñ pyrthei.
Haba kyrngah ban batai ïa ki jingpynsngew ki nongïashim bynta, u Bah Diengdoh ula ong “Kiba bun ki seng saiñ pyrthei ki la khmih ïa ka jingbatai bad kam shym don satia kano kano ka jingbym ïahap jingmut kaba khraw bad kaei kaba ka Committee kala pynpaw ha ka kaiphod”.
“Ki la ïaroh ïa ka jingshisha ba ka Sorkar ka la khot ïa ki kumba u Myntri Rangbah ula pynpaw ba kane kan sa urlong” ula ong haba bynrap ba ‘Lada donkam, yn sa pynlong ruh ïa ka jingïakren shuh shuh ïa kane ka kam bad kiwei”.
Baroh ki seng sain pyrthei kila wan ban ïashim bynta ha kane ka jingialang lait noh ka Voice of the People Party (VPP).
“Ki (VPP) ki la ai da ka jingthoh ba kin ym lah ban ïashim bynta, kumta kan bha ba phin kylli na ki. Ngi la khot lut ïa baroh ki seng saiñ pyrthei hynrei kaei ka daw ba ki khlem wan ïashim bynta, nga tharai ïa kata ka jingkylli phi hap kylli na ki” ong u bah Diengdoh.
U ïathuh ba ka jingbatai ba shikynta eiei ka la pynleit jingmut halor ki mat ba kongsan, ka jingshong aiñ, ka jingïeng kat kum ka riti synshar ka ri, naba bun na ki mat ki ïatyngkhuh bad ka riti synshar lane ki aiñ”.
La kyntu ïa ki seng saiñ pyrthei ba kin pule bniah ïa ka kaiphod bad ban nang aiti shuh shuh ïa ki jingai jingmut lada donkam.
“Ngam tharai ba dang donkam sa kawei ka jingïalang, Katto katne ki seng saiñ pyrthei ki lah ban nang ai ïa ki jingai jingmut hadien ba ki la pule bniah ïa ka kaiphod” ong u bah Diengdoh.
“Baroh na ki, k ila ïaroh bha ba ka Sorkar kala khot ïa ki bad ngi la ai ïa kane ka jingbatai sha ki” ula bynrap.
Ki seng saiñ pyrthei kiba la poi sha ka jingialang ki long :- ka United Democratic Party (UDP), Bharatiya Janata Party (BJP), Trinamool Congress (TMC), National People’s Party (NPP), Khun Hynniewtrep National Awakening Movement (KHNAM) bad Hill State People’s Democratic Party (HSPDP) . Kine ki la ïashim bynta ha kane ka jingïalang ban ai jingkren ruh halor ka kaiphod jong ka Expert Committee.
ïa ka jingialang la pynïaid da u Myntri Rangbah ka Jylla Conrad K Sangma uba la khot ban pan ïa ki jingai jingmut na ki seng saiñ pyrthei halor ki jingai jingmut jong ka Expert Committee on State Reservation Policy.
Haba ïakren bad ki nongïalam saiñ pyrthei, ki la pynpaw ba ka Sorkar ka la pynurlong ïa ka jingkwah ka VPP da kaba khot ïa ka jingïalang jong ka All Party hynrei kyndit ban ïohi ba u President ka VPP ula kyntait pat ban wan sha ka jingïalang.
“Kan don jingmut aiu ban hylla surok bad pynsyrwa kai ïa ka por u paidbah lada kiar pat ïa ka rynsan kaba dei bad ïa ai jingmut bad kdew lynti lada ym pat hun ïa ka kaiphod” kila pynpaw.
Shuh shuh na ka liang ki Nongïalam jong ki seng saiñ pyrthei ki la pynpaw ruh ba ïa mynta kim pat don ei ei ban ong namar kin dang pule bniah shwa ïa ka kaiphod bad hadien kata lada dang donkam kin sa ai jingmut lane pynpaw ei ei sha ka sorkar.