Iashim bynta shitrhem ki paitbah ha ka jingpynkhuid shnong bad thung dieng ha New Nongstoiñ

Nongstoiñ, Jymmang 06 : Na ka bynta ban wan rah ïa ka jingkhuid jingsuba hapoh ka shnong New Nongstoiñ kumba la pynbeit da ka dorbar shnong mynta ka sngi hatmajai ka 5 tarik Jymmang ki paitbah nong shong shnong ha man la ki kyntoit naduh Spengthawlangmlah, Them ïew, Mawbyrshem bad kiwei kiwei ki kyntoit ki la ïamih ryntih naduh dang step ban pynkhuid ïa la ki jong ki jong ki jaka.
Hadien ba la dep ka jingpynkhuid shnong la pynlong ïa ka jingïalang ha Market complex ha khmat ïew ha kaba la pynïaid da ka kong A.Kharsyntiew secretary ka Senglongkmie New Nonstoiñ ha kaba la wan ban ïashim bynta ha ka jingïalang da u bah Gabriel Wahlang MLA, u bah Juristman Ïawphniaw MDC ki ophisar sorkar ba kynthup ïa u bah S.Diengan Divissional Forest Officer West Khasi hills u Deputy Supritendent of Police West Khasi hills , u Paiem Phyllasingh Syiem u syiem ka hima Nongstoiñ, ki riew rangbah kiba la shah khot sngewbha, ki longkmie, ki samla bad ki khynnah skul.
Ha katei ka jingïalang la ïoh ïa ka jingkren la ïoh ïa ka jingkren na u Syiem ka hima Nongstoiñ , na u bah Juristman Ïawphniaw MDC, u bah sraly Rashir sordar shnong New Nongstoiñ, u bah S.Diengan bad khatduh eh la ïoh ïa ka jingkren na u bah Gabriel Wahlang MLA ka Nongstoiñ.
Kitei ki riew rangbah haba ai jingkren ha katei ka sngi ki la ban jur ba ka jinglehkhuid ka dei kaba don kam haduh katta katta ha ki shnong ki thaw , ha ki ïng ki sem bad ha ka jingim shimet ruh. Nalor kata ki la kyntu ïa ki paitbah kiba ïaid ba ïeng ba ki dei ban ñewkor ïa ka jinglehkhuid bad ba kin kynmaw ba lada ki bam ïa ki jingbam ba la dep song lypa kum u kwai, lada ki dih um, bad kiwei ki dei ban kynmaw ban kiar na kaba bret pathar ïa ki jingsong khamtam ïa kiba dei ki kynja plastic namar ki pynjaboh ïa ka mariang.
Ha kajuh ka por ki la kyntu ïa ia kiba ïaid ba ïeng na ki lynti kjat ha shilynter ka sor Nongstoiñ ba kin kiar na kaba tah shun ha ki post eletrik ne ha ki kynroh namar ba ka long kaba bym itynnad satia. Kawei pat ka mat kaba kitei ki nongkren ki la ban jur ka long ban kiar na ka jingpynjaboh ïa ki artylli ki wah ka wah Nonbah bad wah Nondeiñ kiba tuid na pdeng jong ka sor Nongstoiñ.
Halor katei ka mat kitei ki riew rangbah ki la ong ba lada kitei kitei ki wah ki jaboh kan wanrah ïa ka jingsniew dur jong ka sor Nongstoiñ hynrei lada kitei ki wah ki long kiba khuid kan wanrah ïa ka jingitynnad bad ki dohkha doh pnat ki roi. Hadien ba la kut ka jingïalang la pynlong la leit ban thung dieng sawdong ka madan shnong New Nongstoiñ bad ha shilynter jong ka rud wah Nondeiñ ha kaba la ïashim bynta lang da baroh ki ophisar sorkar ki nongshong shnong bad ki sengsamla ha kaba ïa ki tynrai dieng la ai sngewbha da ka forest department.