Shillong, Naitung, 16: U Myntri Rangbah ka Jylla u Conrad Sangma u la ong ba ka Sorkar ka la shim ïa kiba bun ki lad ban pynthikna ba ka jingshakri sha ki paidbah kan long ha manla kawei pa kawei ka tnat treikam jong ka Sorkar.
Ki don bun ki khep ha kaba ka jingthmu ban ai ïa ka jingshakri ka sahteng namar ba ka jingphaikhmat ka long tang ban kynjoh sha ka thong bad ban pyntreikam ïa ki skhim, ban bud ïa ki kyndon hynrei ngi klet noh ban ai ïa ka jingshakri kaba bha sha ki paidbah, u la ong.
U la bynrap ba ka Integrated Web Portal kan long u mawjam na ka bynta ban ai ïa ka jingshakri kaba janai tam sha ki paidbah. U la bynrap ba 188 tylli ki jingai jingshakri yn leh lyngba kane ka Portal bad u la kyntu ïa ki tnat treikam ba kin bud nuka da kaba buh hakhmat ïa ka thong khlem da pynslem.
Lah ban kdew hangne ba ka Meghalaya Right to Public Services Act 2020 ka dei ka aiñ ba la shna khnang ban ai ïa ka jingshakri kaba kham stet sha ki paidbah ha ka jylla hapoh ka por kaba la buh kynthup ruh ïa ka jingdaiñ kuna ïa ki shakri sorkar lada kim lah ban ai ïa ka jingshakri ha ka por ba la buh. Ïa kane ka Portal la shna pynwandur ha ka rukom kaba suk khnang ba ki paidbah kin dup lah ban pyndonkam.
Lyngba kane ka Integrated Web Portal ki ophisar bad ka Commission kin sa lah ban peit bad bishar ïa baroh ki apliekshon ki ban sa wan. Ki nongshong shnong kiba don ha ki shnong bad ki jaka kiba kham duna ka mobile network ki lah ban leit sha ki Common Service Centers na ka bynta ban pyndonkam ïa kane ka Portal.
