Shillong, Naitung, 16: Ka tnad ka koit ka khiah ka jylla hynne ka sngi ka la sdang na Rynjah State Dispensary ïa ka jingai tika ïada lane ka booster dose na ka bynta ki nongshong shnong kiba la dap 18 snem sha jrong.
Katkum ka jingïathuh da ka Dr. B Manners, State Immunization Officer, ka jingwan ki paidbah ban ai ïa ka tika ïada ka duna bha watla ïa kane ki la sdang naduh u Jymmang mynta u snem.
“Haba ïa nujor ïa ka jylla jongngi bad kiwei pat ki jylla, ka jingwan ki paidbah ka duna haduh katta. Lait na ka Nagaland ngi long kiba khatduh ha ka jingwan kiba ai tika. Ngi ïohi ba wat ki khynnah skul ruh ki duna bha ban ai lehse lah ban dei ba ki dang don ha ka shuti Lyiur,” ong ka Dr. Manners.
Katkum ka jingong jong ka, ki nongshong shnong kiba la pyndep ïa ka jingai tika kaba ar sien ki lah ban ai ïa katei ka booster dose hadien 6 bnai.
“Ngi ïohi ba kane ka khlam ka dang don bad ha kiwei ki jylla ruh ka sdang kiew. Ngi ïohi ruh ba ha Manipur mynin ki don ki skul kiba khang noh namar ba la bun kiba ïabit. Wat ha Meghalaya ruh ngi ïohi ba ki la sdang bun biang kiba ïabit. Ngim tip ïoh ki kiew biang bad ngi lah ban duh noh ïa ka jingleit skul jong ki khun. Kumta ngi sngewsih kein ba ïoh ki skul kin khang biang sa shisien,” bynrap biang ka Dr. Manners.
La pynbna ruh ba katei ka tika ïada ki paidbah kin ïoh ei khlem da donkam siew ei ei ha baroh ki jaka sumar jong ka sorkar.
Na ka liang ki doktor ki kyntu jur ïa ki kmie ki kpa bad ki nongshong shnong ba kin shimkhia ban phah ïa ki khun ba kin ai ïa ka tika bad khamtam eh ïa ka booster dose na ka bynta ka jingshngain jong ki hi.
Ïa katei ka jingai tika ïada la pyllait paidbah da u MLA ka Nongthymmai, Bah Charles Pyngrope ha ryngkat ka jingdonlang u Medical Officer jong ka Rynjah Dispensary, ki nos bad ki paidbah kiba.
