Jubab syndon u CM da ka kam halor ka VDA hun jrut ki Muster Roll weng ïa ka jingïakhih

Shillong, Jymmang 5 : Ka Joint Action Committee (JAC) ka Meghalaya Muster Roll Workers Union ha ka Lah Sngi U Blei, ka la ai khublei ïa u Myntri Rangbah ka Jylla u Conrad K Sangma namar ka jingpynkiew ïa ka Variable Dearness Allowance (VDA) ki muster roll bad ki nongbylla sngi, haba ong ba u CM ula “jubab da ka kam” ïa ka jingdawa ba la slem bah jong ki.
U nongaibuit ka JAC Bah Khroo L Pariat ula ong ba ka jingpynbna ha ka May Day ka la weng ïa ki jing sngewkhia kiba ka Union kala pynsngew da ki snem.
“Ha ka 1 tarik Jymmang, kaba dei ka May Day, ngi ïohi ba u Conrad K Sangma ula pynbna ba la pyn kiew ïa ka VDA na ka bynta ki muster roll bad ki nongbylla sngi” ong u Bah Pariat.
“Ngi pdiang ïa kane ka jingpynbna lane ka hukum bala pynmih da ka Tnad Labour bad ha kajuh ka por ngi ai khublei ïa u Myntri Rangbah ba ula ai ka jingmynjur ïa ka jingdawa jong ngi bad shim khia ïa kaei kaba ngi la pynpaw, ïa kiba ngi la ïakhih la slem bha” ula ong.
“U Myntri Rangbah ka Jylla ula jubab da ka kam” bynrap u Bah Pariat. Ka JAC ka don jingthmu ban pynlong ïa ka jingïakhih ha baroh kawei ka Jylla ha ka 11 tarik Jymmang, hynrei ka la rai ban weng noh ïa kane ka jingthmu hadien jong ka rai ka Sorkar.
“Ha ka jingshisha, ngi la thmu ban ïakhih ha ka 11 tarik ha baroh kawei ka Jylla, hynrei ka Sorkar lyngba u Myntri Rangbah, ka la sngap ïa ki jingdawa jong ngi” ula ong haba pynpaw ba kane ka jingpynkiew ïa ka VDA kan ai jingmyntoi khamtam eh ïa ki nongtrei kiba la rangbah.
Haba phai sha ka jingkynthup lang ïa ka EPF, ula ong ba u Myntri Rangbah ula mynjur da ka ktien ha ka jingïakynduh ba long ha ka 9 tarik Iaiong. ‘Kaba kongsan eh ka dei ka EPF. Halor kane, ka JAC ka la aiti ïa ka jingthoh bad ha ka jingïalang bad u Myntri Rangbah ha ka 9 tarik Iaiong, na ka liang jong u, ula mynjur ba ka SorkarPdeng ka la ong ba baroh ki nongbylla sngi, ha ki tnad, ha ki kompani, contractor kiba don palat 20 ngut ki nongtrei, ki dei ban ai ïa ka EPF” ong u Bah Pariat.
“U Labour Commissioner ruh ula dep pynmih ïa ka jingbthah da ka jingthoh sha ki Tnad bapher bapher ba dei ban pyntreikam ïa ka EPF” ula bynrap.
Ka JAC ka la kyntu ïa baroh ki Tnad Sorkar kynthup ïa baroh ki Ophisar, ki Engineer ba kin pyntreikam noh ïa ka EPF kumba la pynpaw da u Myntri Rangbah ba dei ban pyntreikam ïa ka
Ula kyntu ruh ïa ki nongtrei ba kin ïashim bynta. “Lada pyntreikam ïa ka EPF, ki nongbylla sngi ki dei ban wan shakhmat ban kyrpad ïa ki Ophisar ba kin pyntreikam ïa ka. Ka don ruh ka pension ha ka EPF.