Da ka District Training yn pynsuh thied ka BJP ha kaba ïadei bad ki kam jong ka seng

Shillong, Jymmang 5: Kum shi bynta ban dang pynsuh thied shuh shuh ia ka party, ka Bharatiya Janata Party (BJP) ha ka 8 tarik mynta u bnai Jymmang kan sdang ban pynlong ia ka District Training ka ban ai jinghikai ia ki nongtrei ka party ha man la ki District jong ka jylla.
Haba kren bad ki lad pathai khubor u Bah Wankitbok Pohshna uba dei u State General Secretary u la ong ba kane ka District Training yn sdang ha ka 8 tarik na Jantia Hills bad bud pat sa kiwei de ki district.
Shuh shuh u la pyntip ba ka jingthmu ba kongsan jong kane ka District Training ka long ban ai jinghikai ia ki nongkitkam ka party na ka bynta ban pynsuh thied ia ki kam jong ka party haman la ki district.
Kine ki district training kin long ha Jaintia Hills la 8 tarik u Jymmang, ha Khasi Hills 16 tarik u Jymmang, Garo Hills la 22 u Jymmang bad ha West Khasi Hills ha ka 27 tarik, Ri Bhoi la 30 tarik u Jymmang.Kane ka training kandei beit baroh shi sngi bad ban ai ka jingtip kiba bniah ha kiba kip hang.
U Bah Pohshna u la ong ba kin ioh ruh ka jingtip ha kaba iadei bad ka history jong ka party ba ha ka nongrim aiu ba ka party ka ïeng bad ha kaba iadei bad ki scheme bapher bapher jong ka sorkar nalor kiwei kiwei.
Ka jingthmu jong kane ka training ka long ban pynsuh thied ïa ka party bad ruh halor ka nongrim jong ka party bad ki nongshah ai jinghikai kin ioh ka jingtip ba bniah ne tip shwa ïa ka nongrim jong ka party.
Ynda la dep kane ka district training kan sa don pat ka state training ban ai jinghikai hapoh ka jylla, ong u Bah Pohshna.