Shillong, Jymmang 5 : Ka Jylla ka la sakhi ïa ka jingjur bha ka jingshah dait ksew ki briew- ym tang ki ksew surok hynrei wat kiba ri ki briew – kaba lah ban buh ruh ïa ka jingim ki nongshah dait ha ka jingma ba lah ban poi ruh sha ka jingiap lada ym shim ïa ki jingsumar. Namar kata, ka long kaba kongsan ba ki nongshong shnong kin tip ïa ki aiñ, ki ba lah ban teh lakam ïa ka jingshah dait ksew.
Haba phai sha ki ksew ba ri ki briew, ka Aiñ Bharatiya Nyaya Sanhita (BNS) 2023, ka la buh kyrpang ïa ka kyndon aiñ, ka ban ai jingpynsajia ïa ki trai ksew kiba pyllait laitlan ïa ki jingri jong ki, lada jia ryngkat ba ki dait ïa ki briew ba ïaid ba ïeng.
Kat kum ka kyndon 291 jong ka BNS Act, 2023, la kren shai ba la khang pyrshah ïa ka jingpyllait laitlan ïa ki ksew ba ri, buh jingma ïa ka jingim briew lane pynmong pynmynsaw kaba mut lada ki ksew ki dait briew, ki trai kin ngat ha ka jing shah set along haduh hynriew bnai lane bad ka kuna kaba long haduh 5000 tyngka lane baroh artylli ki jingpynshitom.
Ka aiñ ka ong ba la khmih lynti ba ki trai kin tehlakam ïa la ki jingri, buh ha ki jaka kiba shngaiñ, lane pynkiar ïa la ki jongri na ka jingbuh jingma ïa kiwei.
Ka kren shai ruh ba kine ki jingpynshitom ka dei ruh ïa ka jingbym phikir ïa la ki jingri la ka long kaba leh khnang haba tip a ka jingma hynrei leh bym patiaw lane ba shu jia ryngkhat ne ka jingbym shim lypa ïa ki lad jingïada.
`Ka ong ba wat lada kam shym la jia kano kano ka jingma ïa kiwei, ka jingbym phikir hi ïa la ki jingri ka dei kaba lah ban pynshitom lada ka buh ïa ka jingma.
Namar kata, ka long kaba donkam ïa ki nongri ksew ba kin phikir bad set ïa la ki jingri ha ki jaka kiba shngaiñ, ym ban shu pynlait lan lym kumta ki jingpynsajia ki ap hakhmat.
