Chennai, Jymmang 05 : U hehduh ka TVK ba dei ruh u aktor ba pawnam na Tamil Nadu u Chandrasekaran Joseph Vijay u la ong ba kin ap tang ïa ka por ban ïoh thaw ïa ka sorkar ba thymmai ha Tamil Nadu hadien ba ka party ka la jop haduh 108 seat na ka Iing Dorbar kaba don haduh 234 ngut ki MLA.
Ha shwa kane, u Vijay u la leit ruh ban buh syntiew ha ki nongïalam kiba u niewkor ba ki dei ki nongmait lynti ïa u ha kane ka lynti. Hadien kane pat u la lum ïa ka jingïalang bad baroh ki nongmihkhmat ba thymmai, shisngi hadien ba ki la khur ïa ka jingjop kaba donburom bad kaba thaw rekod ïa kano kano ka seng sainpyrthei ha katei ka jylla.
Mar ïa sdang ka jingïalang, u Vijay u la ïoh ïa ka jingpdiang burom kaba shongkun bha na baroh ki MLA kiba jop namar shwa ba un rung shapoh khrui ki ieng lut ban risa namar baroh ki MLA ka TVK ki dei kiba dang thymai lut kum u nongïalam hi ha ka sain pyrthei.
Ha kane ka jingïalang, u Vijay u la ïa kren na ka bynta ban jied ïa u nongïalam jong ka legislature party bad ruh ban hikai ïa ka kamram jong ki hapoh Iing Dorbar.
Halor ka jingkylli ba kumno ka TVK kan ïoh ïa ka jingbun paid ban thaw ïa ka sorkar namar ki duna sa 10 ngut ki MLA, u nongïalam ka party u Nanjil Sampath u la ong ba ki nongïalam ka party ki la tip kumno ban leh ïa kaba donkam.
“Nga sngewtikna ba ngin ïoh ban thaw ïa ka sorkar bad ngi khmih lynti ba shen kan sa urlong noh,” u la ong.
