Plie u MLA ka Mawkyrwat ïa ka St. Mary’s Podium bad Sitting Gallery ha Mawthong Parish
Mawkyrwat, Jymmang 05: U bah Renikton Lyngdoh Tongkhar uba dei u MLA jong ka Mawkyrwat Constituency kum u kongsan ha ka 3 tarik u Jymmang 2026 ula ïoh ban plie paidbah ïa ka St. Mary’s Podium kaba la bei tyngka lyngba ka Chief Minister (CM) Scheme jong u snem 2025-26, kaba long T. 10 lakhs ha ka Mawthong Parish ha ryngkat bad ka sngi lehburom Parish.
Ha kajuh ka sngi, ula plie ruh ïa ka Sitting Gallery kaba la bei tyngka lyngba ka MLA Scheme jong u snem 2024-25, kaba long T. 5 lakhs.
Lah ban kdew ba kine ki ar tylli ki projek kin sa long shisha ki jingkyrkhu bakhraw ïa ki paidbah jong kane ka dong ka thaiñ, khamtam eh ïa ka Mawthong Parish, da kaba kyntiew bad kynshan ïa ki jingïalang paidbah bad ki jingïalehkai ne jingïalang shnong.
Haba kren ha ka jingïalang, u bah Renikton Lyngdoh Tongkhar, MLA ka Mawkyrwat u la ong ba lyngba kine ki lad jingïarap na ka Sorkar, ba na ka por sha ka por ka la pyrkhat na ka bynta kane ka Parish bad ka la long kaba jop ha kaba mynta la ïoh ban plie ïa ki ar tylli ki jingtei ba ka bei tyngka na ka skhim ba la bhah da ka Sorkar kata ka jingtei ïa ka St. Mary’s Podium bad ka Sitting Gallery. “Ym tang ki kam pynroi lyngba ki jingtei hynrei wat na ka bynta ki skul pule ha kaba kum ka Parish kaba don ruh ïa ka shlem ai jinghikai ha ka pule ka dangle kan sa ïoh sa kawei ka School Bus ban kit ïa ki khynnah pule”, ong u bah Renikton.
Namarkata, ban pynurlong sa kiwei pat ki kam pynroi ha kane ka Parish, u bah Renikton ula buh ka jingkyrpad ba ka donkam ïa ka jingïatreilang khnang ba ki jingthmu kin long kiba jop.
La plie ïa kine ki projek ha ka jingïadonlang u Fr. Herodest Lyngdoh uba dei u Parish Priest Mawthong Parish, u Fr. Domescius Lyngdoh kum u Assistant Parish Priest Mawthong Parish, u Brother Colinsius Wanniang kum u Superior Mawthawiang bad baroh ki riewngeit ka Balang Catholic jong ka Mawthong Parish, kiba la pynpaw ïa ka jingsngewnguh bad jingïaroh ïa kine ki jingmyntoi kiba wanrah jingbha ïa ka imlang sahlang.