Yn bud ka BJP ïa ki dienjat ki nongtrei ka seng na West Bengal bad Assam, ha ka MP elekshon

Shillong, Jymmang 5: Kum shi bynta jong ka jingpynkhreh ia ka election MP shiteng samoi na Shillong parliamentary seat, ka Bharatiya Janata Party (BJP) kala pynpaw ba ki kwah eh ban bud ia ka rukom trei kam ki nongtrei ka party na West Bengal bad Assam ha ka ba la sakhi ia ka jingjop ba don burom jong kaparty ha kine ki ar tylli ki jylla.
Haba kren bad ki lad pathai khubor u Bah Wankitbok Pohshna uba dei u State General Secretary u la ong, ki la don ki riew paw khmat ka jylla kiba la pan ticket na ka bynta ban iakhun ia ka election MP shiteng samoi, tangba ka rai kan dei beit na ki khlieh nongialam ka party.
Shuh shuh u Bah Pohshna u la ong, kum ka party ki da kwah ban bud ia ka rukom trei kam ki nongtrei ka party na West Bengal bad Assam khnang ba kin lah ban pynjop ia u kyrtong ba ka party ka pynieng.
U Bah Pohshna u la ong ba ka party ka khmih lynti ba kan lah ban leh bha ha kane ka kynti ba mynta namar ba ka jingmih ki result ha ka jylla West Bengal bad Assam ka pyni ba ki paidbah ki don ka jingshanniah ha ka rukom trei kam ka BJP.
” Ngi ngeit skhem ba lada ki paidbah ka jylla Meghalaya bad khamtam na ka Shillong parliamentary seat, lada ki ai lad ïa ka party kan long kaei kaei ban wanrah shibun ki jingmyntoi ïa ka constituency ” ong u Bah Pohshna
Shuh shuh u Bah Pohshna u la ong, “Ngi kwah eh ban bud ïa ka rukom trei kam ki nongkit kam ka party na ka jylla West Bengal bad Assam bad ta ka daw ba ngi sa pynlong ïa ka district training ha man la ki district khnang ba ki nongtrei ka party kin trei shitom bad trei shitrhem kumba ki nongtrei na West Bengal bad Assam kila trei”.