Sha u SP-EJHD ujor u muktiar Dawanmon Pachiang ïa ki trok kit maw kiba buh jingma ïa ki paidbah

Khliehriat, Jymmang 04 : U muktiar uba na East Jaiñtia Hills District, u Dawanmon Pachiang, mynta ka sngi u la buh jingujor hakhmat u Superinendent of Police East Jaiñtia Hills District halor ka jinglap jong u ba don ki trok kiba kit ïa ki maw heh, ki maw rit kiba khlem biang ki jingiada bad haba ki iaid ha surok kaba lah ban buh jingma ïa ki paidbah ba leit ba wan.
Katkum ka ujor ba la buh u bah Dawanmon Pachiang u la ong “La sakhi bunsien ba ki trok kiba kit mawheh bad maw rit kim ju tap bha ïa ki mar da ka tarpaulin lane kim ju pyndonkam da kiwei pat ki lad jingïada kiba donkam bad kane ka jingbym shimkhia ka buh jingma kaba khraw bha ïa ki kali rit kiba bud na dien, ka buh jingma ruh ia ki briew kiba ïaid lynti bad kito kiba ïaid kjat, namar ka don ka jingma ba ioh ki maw kin hap na ki trok katba ki dang ïaid lynti, kaba lah ban wanrah ia ka jingma jingmynsaw bad jingjulor ïa ki kali lane kaba lah ban wanrah ruh ïa ka jingjia kaba sngewsih”
“Nga kwah ban pyntip kyrpang ïa kawei ka jingjia kaba nga la mad hi myn ha ka 01/05/2026, ha kaba uwei u mawbah u la hap na kawei ka trok kaba kit maw, kaba ym don kano kano ka lad jingïada ne jingteh, ym don rh ka jingtap tarpaulin kaba biang, une u maw u la jan ktah ïa ka kali jong nga, kaba lah ban wanrah jingjulor kaba jur ne wat kaba lah ban lam ruh sha ka jingïap briew ruh, kane ka jingjia ka pyni shai ba ka long kaba donkam kyrkieh ban pyntreikam tyngeh ïa ki kyndon jingïada”
Na ka liang u muktiar u la kyrpad ia ka ophis jong u Superinendent of Police East Jaintia Hills District ban shim khia mardor halor kane bad u la ai jingmut ruh ba dei ban leh eiei pyrshah ïa kum kine kiba kit mar da kane ka rukom ka bym shngain, ban pyntreikam ïa ka jingïaid beit jong ki kyndon jingïada, kynthup ïa ka jingtap bad jingteh bha ïa ki mar, u kyntu ruh ba dei ban leh ia ka jingpeit bniah man ka por bad pynngat ha ki kyndon jingpynshitom kaba tyngeh ïa kiba leh pyrshah khnang ba kum kane kam dei ban ban jia ba kan nym buh jingma ïa ki briew bad ïa ki kali kiba iaid ha surok, namar ka jingleh thulmur bad leh khlem pyrkhat lang ïa kiwei kan ktah beit beit ïa ka jingshngain jong ki paidbah.
Ïa kane ka shithi jingujor u bah Dawanmon Pachiang u la ai copy ruh sha u Deputy Commissioner ka East Jaiñtia Hills District.