Wat la phi beiñ phi khoh bad kynnoh da ki har rukom ïa ka sorkar MDA ba la ïalam da ka NPP bad ïadon lang naduh ka UDP, BJP, HSPDP bad ki MLA shimet, hynrei ym pat ju don sorkar kaba kum kane ha ka histori jongka jylla Meghalaya bad kata ka long ba ka dei ka sorkar kaba kloi bha ban khot ïa kino kino ki Seng ne ki Kynhun sha ka miej jingkren ïasngewthuh jingmut.
Dang mynta ka sngi ki Nonghikai Deficit ha ki Skul bad ki College ki pynlong ïa ka jingïakhih da kaba tah bad wah da ki jingthoh bapher bapher ne tah poster ha kylleng ki district jongka jylla ban dawa na ka sorkar ban pyntreikam da ka draft Provident Fund 2023 ym da kane ka Non-Government School and College Employees Centralised Provident Fund Scheme, 2026, ka sorkar mynta hi ka janmiet ka la khot ïa ki Nongïalam jong kine ki Nonghikai Deficit Skul bad College ban wan sha ka miej jingïakren ka ban long ha ka 6 tarik mynta u bnai ha Main Secretariat Conference Hall ban ïïakren sngewthuh halor kine ki jingdawa jongki.
Khlem pep ha katei ka Sngi ka jingïakren kan long beit kaba seisoh namar une u Myntri Rangbah ka jylla u dei u Myntri Rangbah uba nud ban shim rai mar mar ym dei uba ju pan por bad uba pynjalani ïa ka por. Namar kumba ka sorkar ka shim khia ban siew ryntih ïa ka tulop na ka bynta ki Nonghikai bad Nongtrei SSA bad 4th Teacher kumjuh ruh kan pyrkhat beit ïa kine ki Nonghikai bad Nongtrei jong ki skul bad College Deficit. Kine lei lei ym tang ba ki pynpaw ka jingsngewnguh ki da pynlong ïa ka jingïalang pynkup burom ïa u Myntri Rangbah, Symbud Myntri Rangbah, Myntri ka tnad pule puthi bad ïa kiwei kiwei ruh halor kane ka jingioh jongki da ka tulop ba thymmai.
Lada phai sha kino kino ki kynhun bad seng kiba ïa khih pyrshah halor ki nongrim ka sorkar hadien ba ka bishar bniah lada ka lap bad shem ba ka lah ban long kaba bakla ka kloi ban pynbeit bad pdiang ïa kita ki jingbakla kumba ka la jia dang shen halor ka Umiam Resort Pivate LTD. Hadien ba la mih ka jingpyrshah jur na ki dkhot ka Green Tech Foundation ïa ka jingai wai ïa ka Lumpongdeng bad haba ka sorkar ka la bishar bniah ka la rai ban ym pynngat shuh ïa katei ka jaka ha ka project jongka Taj Resort and Spa.
Shuh shuh kum mynta ka sngi ki Nonghikai jong ki skul Secondary bad Higher Secondary haba ki la ïohsngew ïa kajingkren ai mynsiem jong u Symbud Myntri Rangbah ha katei ka prokram pynkup burom ha Madan Student , Jaiaw ha ka 1 tarik Jymmang 2026 mynta ka sngi ki la leit ïa kynduh kyrpang ïa u ban ai dorkhas ban pynkynmaw ba ki ruh ki la kyrpad ka jingïarap ne Grant in Aid na ka sorkar jylla bad na ka liang u Symbud Myntri Rangbah ruh ula kular ban shim khia ïa kane ka kam ban ïakren bad ïa pynbeit bad u Myntri Rangbah ban pyntreikam ïa kine ki mat jingdawa.
Kumta na ka liang ka sorkar ruh ym ong ba 100 % ka kloi ban pyndem hynrei ki don ki khep lehse ba ka sorkar ruh ka kheiñ sting bad kam khot ïakren mar mar haba ka ïohi ïa ki jingpyrshah ruh. Ka sorkar ruh namar kata ka dei ban shim khia ban khot ïakren mar mar ïa kino kino ki seng ne ki kynhun kiba byrngem ban ïakhih ym dei ban ap haduh ban da ïakhih sa khot ïakren ia ki. Kumjuh ruh ki seng bad ki kynhun ruh ki dei ban sngap haba ka sorkar ka khot ïakren sngewthuh jingmut ki dei ban long kiba la kloi ban wan sha ka miej jingïakren ïasngewthuh jingmut.
