Shillong, Ïaiong 03 : Ka tnad Excise ka la ïoh ban kurup haduh 600 litar ka kyiad beain ha ka jingkhynra kyiad kaba la pynlong da ka jingtrei lang hapdeng ki pulit ka East Khasi Hills, ha kylleng ki bynta jong ka nongbah Shillong ha ka miet sngi Saitjain.
Ïa kane ka jingkhynra la pynlong ha ki thain Polo, Stand Jeep, bad ki bynta jong ka Urkaliar. Ïa kane ka kynhun la ïalam da u Additional Superintendent of Police ka East Khasi Hills u Saurav Saini ryngkat ka Deputy Superintendent of Police, WCC, Kong Joyti Wahlang.
Katkum ka kyrwoh la ong ba kane ka jingkhynra ka long ban kthong ïa ka jingdie kyiad beain ha ki lai tylli ki jaka. Kumta da kane ka sienjam ki la ïoh ban kurup haduh 600 litar ka kyiad beain. La ïathuh ba ïa kane ka kyiad ba ïoh ban kurup ha kane ka miet la aiti noh sha ka Excise Department ban leh katkum ki kyndon jong ka ain.
