Sha ka NPP rynsied ki nongkyrshan ka UDP, HSPDP, VPP bad na kiwei de ha Mawkyrwat

Mawkyrwat, Jymmang 03 : Ka National People’s Party (NPP) Mawkyrwat Block ha ka sngi saitjaiñ jong ka taïew ka 2 tarik u Jymmang, 2026 ka la ïoh ban pdiang burom ïa shibun ki nongkyrshan bad nongkitkam na kiwei pat ki seng saiñ pyrthei kiba la wan ban pynïasoh sha ka party NPP, ha ka jingïalang paidbah kaba la long ha madan jong ka Nativity Mawkyrwat, South West Khasi Hills District.
Lah ban kdew ba kine ki nongkyrshan kiba la wan pynïasoh ki dei kiba ju long ha ka United Democratic Party (UDP), ka Hill State People’s Democratic Party (HSPDP), ka Voice of the People Party (VPP) bad na kiwei de ki seng saiñ pyrthei. Lah ban ong ruh ba ka jingleit pynïasoh jong ki nongkyrshan ka UDP Mawkyrwat Block ka dei hadien ka rai kaba la shim ha ka General Meeting kaba la long ha ka 16 tarik u Ïaïong, 2026 ha Dorbar Hall, Mawkyrwat.
Ha kane ka sngi, u Bah Prestone Tynsong, Symbud Myntri Rangbah ka Jylla Meghalaya bad kum u State President ka NPP, ryngkat kiwei de ki riew rangbah jong ka party, ki la pdiang sngewbha ïa ki nongkyrshan ba thymmai da kaba pyndeng ïa u mawphlor ka party NPP kum ka dak jong ka jingpdiang burom. Hadien kata, la pynbud ruh da ki jingkren na kiba la wan rung thymmai, kynthup ïa u Bah Polanding Sohphoh na ka HSPDP bad u Bah S.K. Budnah na ka UDP, kiba la pynpaw ïa ka jingkmen bad jingkular ban trei lang bad trei shitom ryngkat ka party NPP ha ki sngi ki ban sa wan.
Haba ai jingkren, u Bah Prestone Tynsong u la batai bad pynsngew paidbah halor ki kam pynroi kiba ka sorkar MDA–II hapoh ka jingïalam jong ka NPP ka la lah ban leh ym tang ha ka Jylla Meghalaya hynrei wat ha kiwei de ki jylla jong ka Ri India ruh. U la kdew ruh ba ka thong kaba hakhmat eh jong ka party ka long ban wanrah ka jingïatylli bad jingïalong kawei hapoh ka thaiñ North East.
U la pynpaw ruh ka jingkmen halor ka jingwan pynïasoh jong kine ki nongkyrshan ba thymmai bad ula ong ba ka jingwan jong ki ka la nang pynkhlaiñ shuh shuh ïa ka party. “Mynta phi la long shibynta jong ka ïing hapoh ka NPP, ym shuh kum ki briew kiba nabar hynrei kum kawei ka longïing ne ‘Family’,” la ong u Bah Prestone, bad ha kajuh ka por ula buh jingkyrpad ïa baroh ki dkhot ne ki nongkyrshan ba kin don ka jingïatreilang bad jingïasngewthuh jingmut ban pynurlong ïa ki kam bad ban kyntiew ïa ka roi ka par ha ka Jylla.
Haba kynthoh ïa ki jingïakren paidbah na kiwei pat ki seng saiñ pyrthei, u Bah Prestone ula ong ba ka NPP kam pynlut por ban pyrta ha ki surok hynrei ka trei shitom ban wad ne leit tied jingkhang bad leit ïakren ïa bun ki kam ha Nongbah Delhi. Ula kyntu ruh ïa ki paidbah ka South West Khasi Hills District ban pyrkhat sani bha bad ban nym ngeit ne pdiang ïa ki jingïathuh bakla hynrei ban da pynshong nongrim ïa ki jingshisha.
Kiwei de kiba la ïadonlang ha kane ka jingïalang ki long u Bah S. Sohtun, Myntri ka Sorkar Meghalaya ba dei peit ïa ka C&RD Block, u Dr. Celestine Lyngdoh, MLA bad nongaibuid ka Sorkar Meghalaya, bad ka Dr. Ampareen Lyngdoh, MLA bad nongbuid ka Sorkar Meghalaya, ryngkat ki nongkitkam ka NPP na ka South West Khasi Hills District.