Shillong, Jymmang 01 : U Myntri Rangbah ka Jylla Conrad K Sangma ha ka sngi Thohdieng, ula ïashim bynta ha ka jingpynrung kyrteng hi dalade ïalade lyngba ka kor online ne ka online self-enumeration drive jong ka khana samari 2027.
Haba thoh ha X, u Myntri Rangbah ula pynshlur ïa ki nongshongshnong ba kin ïasnohkti lang ha kane ka jingpynrung kyrteng dalade ïalade ban ïarap ïa ka jinglum khana samari ka Ri.
“Sngewkmen ban ïashim bynta ha ka online Self-Enumeration Drive jong ka Census2027. Kane ka kam ka pyni ïa ka jinglum khana samari ba nyngkong eh lyngba ki kor digital ka India” ong u Conrad.
“Nga pynshlur ïa baroh ki nongshong shnong ba kin ïashim bynta ha ka jingpynrung kyrteng hi dalade ïalade bad ban ïarap ban pynlong ïa kane ka jinglum khanasamari ka ri ba kan long kaba kham sted, kham suk bad kham janai” ula ong.
Ka Self-Enumeration Drive na ka bynta ka Housing Census bad House Listing hapoh ka Census 2027 kala sdang ha Meghalaya ha ka 1 tarik Jymmang.
Ka jingpyndonkam ia ka kor digital ka ailad ïa ki nongshong shnong ba kin pyndap hi dalade ïa ki jingtip ba bniah halor ka ïing ka sem jong ki lyngba ka kor online hashuwa ka jingwan ki nonglum khana samari.
