Da ka digital un pynrung pura ha ka khana samari u snem 2027, mynta ka sngi la sdang ha ka jylla

Shillong, Ïaiong 30: Ka jinglum jingtip da lade na ka bynta ka khana samari jong u snem 2027 kan sdang ha kylleng ki jaka jong ka Meghalaya naduh mynta ka sngi ka shi tarik u Jymmang, 2026 bad kane kan dei ka sienjam ba nongkong eh hapoh ka ri India kaba pura da ka digital.
Ïa kane ka jingpynbna la pynbna ha ka jingialang bad ki nongthoh khubor ba la pynlong da ka Press Information Bureau (PIB), Shillong ha ryngkat ka jingiatreilang bad ka Directorate of Census Operations, Meghalaya, kaba la long mynta ka sngi ha Shillong Press Club.
Haba kren sha ki lad pathai khubor, u Director ka tnad Census Operations, Meghalaya, ka sorkar India u Biswajit Pegu u la pynpaw ba ka khana samari u snem 2027 kan long ka sienjam ka ban sah jingkynmaw, ha kaba ïadei bad ka khana samari kaba 16 ha baroh kawei bad kaba 8 naduh ba la ïoh ïa ka jinglaitluid.
U la pynpaw ba ha ka sien kaba nyngkongeh, ïa ka jingkheiñ briew ha baroh kawei-naduh ka jingkheiñ haduh ka jingbishar bniah ïa ki jingtip-yn pynlong da ka digital da kaba pyndonkam da ki mobile application bad ka portal jong ka Census Management and Monitoring System (CMMS).
U Pegu u la pyntip ba ki nongshong shnong kin don ka lad ban kheiñ hi dalade lyngba ka online portal naduh ka 1 tarik u Jymmang haduh ka 15 tarik u Jymmang, 2026.Kane ka ailad ïa ki briew shimet ban pyndap ïa ki jingtip ba bniah jong ka ïing ka sem jong ki, ïa kaba hadien yn sa pynshisha da ki enumerators ne ki nongshim kyrteng ha ka por ba leit rung na kawei ka ïing sha kawei pat.U la ban jur ba kane ka jingthmu kan pynbha ïa ka jinglong kaba shai, kaba thikna, bad ka jingiashim bynta jong ki paidbah ha ka rukom khein ïa ka khana samari.
Ïa ka khana samari u snem 2027 yn pynlong ha ki ar bynta.Ka Phase I ka kynthup ïa ka jingkhein ïalade bad ka jingpynrung kyrteng ïa ki House Listing Operations (HLO).Hadien ka por ban khein ïalade, yn pynlong ïa ka HLO naduh ka 16 tarik u Jymmang haduh ka 14 tarik u Jylliew, 2026, ha kaba ki nongkhein kin lum ia ki jingtip shaphang ki jinglong jingman jong ki iing, ki mar ki mata, bad ki jingdonkam ba kongsan lyngba ka jingkylli ba la buh ryntih kaba kynthup ia 33 tylli ki jingkylli.
Ka bynta kaba ar, ka jingkhein ia ki nongshong shnong, kan long ha u bnai Rymphang 2027, bad ka tarik ba la buh ha ka 1 tarik u Lber, 2027.
Haba pynpaw ia ka ain, u Pegu u la pynpaw ba ïa ka khana samari la pynlong katkum ki kyndon jong ka Census Act, 1948 and Census Rules, 1990.
U la kdew ba ka jingkylla ha ka digital kan pynthikna ïa ka jingbha jong ki jingtip lyngba ki jingkylli ba la buh lypa ha ki aplikeshon mobile bad ka jingpyntreikam kham kloi ïa ki jingmih paidbah ha ka por kaba biang.