Ther ka ïingbishar HC ïa ka sorkar jylla ba ai jingkheiñ bakla halor ki ki kam khaïi mar poh khyndew

Shillong, Iaiong 29 : Ka ïing Bishar High Court jongka jylla ha ka sngi Ba-ar, ka la ther tyngeh ïa ka Sorkar Jylla halor ka jingbym biang ki jingai jingkheiñ ha kaba ïadei bad ka kam khaïi ïa ki mar poh khyndew (minor mineral), haba pynpaw ba kane ka pyni ba ka don ka jingpyrshang ban ïalam bakla ïa ka ïing Bishar ha ka mukotduma public interest litigation (PIL).
Ka Division Bench jong ka Chief Justice Revati Mohite Dere bad Justice HS Thangkhiew, ka la thung ruh ïa u Advocate Philemon Nongbri kum u amicus curiae bad hukum ïa u Commissioner ka Transport bad Secretary ka Tnad Forest ba kin wan mih hi da lade hakhmat ka ïing Bishar ha ka sien shong bishar ban wan.
Haba bishar ïa ka PIL ba la mudui da u Registrar General ka High Court, ka ïing Bishar ka la bishar ïa ka kaiphod ba la aiti da u Advocate General A Kumar na ka bynta ka Sorkar.
Ka kaiphod ba la soi da u Commissioner ka Transport, ka kam ha ka paragraph 10 “ Ka long kaba don kam ban kdew ba hapdeng u bnai Iaiong 2025 haduh Rymphang 2026, haduh 2,030 tylli ki kali ki la kit ïa 25,903 MT ki mar poh khyndew (minor mineral), kaba pyni ba ym duna ïa ka 7 tylli ki kali ki ïaid ha ka shisngi ban khaïi ia ki marpoh khyndew ha Jaintia Hills Territorial Division”.
Ka ïing Bishar ka shem ba kane ka jingkheiñ ba la ai, kam ïahap satia bad ki jingkheiñ ba la pynpaw ha ki annexure ne kiwei pat ki kot ba la suh pyndait lang.
“Ka jingpyntip jong u Commissioner ka Transport ha ka kaiphod ka long pyrshah ïa ka jingbuh jingthoh bad jingkheiñ ba la pyndait lang da u Commissioner ha ka sla 29” ong ka hukum.
Hadien ba ka ïing Bishar kala pynsngew ïa kane ka mat, u Advocate General ula pan por ban ïoh ïa ka jingbthah.
Ka ïing Bishar ka sngew “ba don ei ei ha lyndet, kaba paw ba ka don ka jingpyrshang ban ïalam bakla ia ka ïing Bishar haba ïadei bad kane ka jingai jingkheiñ ba la kdew haneng na ha ka chart ba la pyndait lang kum ka annexure 6 ha ka sla ba 29”.
Ka ïing Bishar ka la kdew ba ka kaiphod ka pyni ba ki kali ki la shah daiñ kuna namar ka jingpynkheiñ ïa ki kyndon 192. 190 (2) bad 179 jong ka Motor Vehicle Act, 1988, hynrei ym shym la pynngat mukotduma satia.
“Ka paw ruh ba ym shym la ujor mukotduma pyrshah ïa kine ki kali, kiba la shem ba ki pynkheiñ aiñ, hapdeng ka 22 tarik Iaiong 2026 bad 25 tarik Iaiong 2026” ong ka ïing Bishar.
Ha kajuh ka por, u DSGU Dr N Mozika ula aiti ïa la ka jong ka kaiphod na ka bynta ki BSF kaba la pynpaw “La pynsngew hangne ba ka kamram jong ki BSF ka long ban ai pahara. Kam don bynta eiei ruh ha ka jingpeit ïa ki kot ki sla ha ka kam khaïi, bad kumjuh ruh ban ai lane talasi ïa ki driving licecne, PUC certificate, fitness certificate jong ki kali kynthup ka jingkit mar, naba ki BSF kim shym la ïoh bor ban talasi ïa kikot ki sla da kano kano ka aiñ”.
Ka kaiphod kala dew ïa ka hukum ka ïing Bishar jong u snem 1999 bad ka shithi na u Commissioner ka Custom, Shillong ha u snem 20023 halor ka kamram ki BSF hapoh ki Land Custom Station.
“Haba shim khia halor kine ki mat bala ïakren, ngi sngew dei ban thung ïa u Bah Philemon Nongbri kum u Amicus ban ïarap ïa ka ïing Bishar” pynkut ka hukum.