Ka NPP ka dei ka party kaba pyni da ki kam bad pynurlong ïa ka jingangnud ki paidbah : Dy CM

Shillong, Iaiong 29 : U Symbud Myntri Rangbah ka jylla u Ma Sniawbhalang Dhar ula shim ba ka jingai jingmynjur jong u Lat ïa ka Meghalaya Official Languages Ordinance, 2026 ka long kum ka rai ka ban sah khana ha ka histori ka Jylla ba la shim da ka Sorkar MDA ba ïalam da ka NPP, haba pynpaw ba kane kan ai jingmyntoi shikatdei eh ïa ki samla jong ka Jylla.
“Kane ka rai kan ai jingmyntoi khlem pep ïa ki samla, kiba dei ki lawei jong ka Jylla” ong u Ma Sniawbha haba kynthoh ïa ka rai jong u Lat ban ai jingmynjur ïa ka Ordinance kaba ai jingithuh kum ki ktien Sorkar ne Official Language ïa ka ktien Khasi bad Garo.
U Symbud Myntri Rangbah ula ong ba kane ka rai ka dei ka jingpynurlong ïa ka jingangud kaba la slem bah jong u paidbah. “Kane ka dei ka jingdawa bala slem jong ki paidbah ka Jylla bad ka dei tang ka NPP kaba ialam ia ka sorkar MDA kaba nud ban pynurlong ïa kane ka jingangud ki paid Khasi, Jaintia bad Garo. Namar ki don bun ki rai ba kane ka sorkar ba ïalam da ka NPP ka la leh, kum ka rai pynbeit pud, ka rai ban pynkynriah ïa ki Harijan na Them ïew Mawlong wat la ka kam ka dang sahteng hynrei ka ban ïaid beit shakhmat bad bun kiwei kiwei. Ka NPP ka dei ka party kaba kren duna ka ktien hynrei kaba jam da ki kam na ka bynta ka bha ka miat ki paid nongshong shnong bad ki samla” ong u Ma Sniawbha.
U Ma Sniawbha ula ai burom ïa ka National People’s Party ba kala pynurlong ïa la ki jingkular. “Nga hap ban ong ba ka NPP kala pyni ba ki kam ki kham jam ban ïa ka ktien bad ka la pyni ruh ba ka dei ka party kaba shakri ïa ki paidbah bad ka Jylla” ula ong.
ïa ka Ordinance yn sa wanrah ha ïing Dorbar Thaw Aiï ban pynlong aiï ba pura kata hadien ba la dep pruid ia ki Aiñ bad Kyndon jong kane ka Aiñ.