Shillong, Ïaïong 28: Ka Awaken India Movement, Meghalaya Chapter (AIM) ha ka sngi baar ka la pynlong ïa ka jingïaid paidbah bad ka jingïalang hakhmat u Dur mot jong u Woh Kiang Nangbah kaba don ha barik point mar pyrshah jong ka Civil Hospital Shillong ban pyrshah jur ïa ka jingshah pynbor jong ki nongshong shnong ka Jylla Meghalaya bad kumjuh ruh jong ka ri baroh kawei ha ka Sorkar ba dei ban pynrung kyrteng ban ïoh ïa ka Aadhaar card.
Haba kren ha ka jingïalang u Chairman ka AIM u Bah Banshai Marbaniang u la ong ba ka Sorkar ka la shu pynbor beit ia ki nongshong shnong ban leh ïa u Aadhaar bad kumjuh ruh ha jylla Meghalaya ruh la pynbor namarba ki ïohi ba ki nong Meghalaya ki tieng.
U la pyntip ruh ba ha ka ktien nongwei ïa u Aadhaar la tip da ka The Facial Recognition Technology bad ha India la khot da u Aadhaar bad lyngba une u Aadhaar baroh ki jingdon jingem, pisa ha ki Bank bad baroh kiei kiei kiba shimet la lah ban ïoh jingtip lut, kumta ki paidbah kin hap ban husiar namar kumba long mynta watla ym don Aadhaar card ruh hapoh ki Bank ki dang pdiang lada don tang ka EPIC bad pancard kumta ki nongshong shnong kim dei ban tieng naba ym don aiñ ba khang hapoh ka ri synshar paidbah lyngba ki article, naba wat ka supreme court ruh ka la pynksan ba ym dei ban pynlong kongsan ïa u Aadhaar card.
Shuh shuh u Bah Banshai Marbaniang u la ong ba bun bah kila shah pynduh khaw rashon bad ki skhim sorkar bapher bapher, ha kajuh ka por ruh u la ong ban dawa na ka High Court bad Supreme Court bad ban shim ïa ka rai ban nym leit thep vote shuh da lei lei ruh em.
Ha kaba sdang na ka liang jong ki Magistrate kila pyrshang ban nym shah ban pynlong ïa ka jingïaid paidbah hynrei na ka liang u shongknor ka seng AIM u la ïa pyni nia da kaba ong ba kane ka dei ka synshar paidbah bad hadien ka jingïakren na ka liang jong ki bor ka District Administration la shah ba kin ïaid.
Ha kane ka jingailad ba kin ïaid paidbah la shah ïa ki na kawei pat ka lynti ym kumba ki thmu bad ïa kane na ka liang ki nongïalam ka AIM ki la pdiang ïa kaei kaba la ïa kren bad ba kin ïoh ban pyndep ïa kaba ki thmu ban ïaid paidbah ban pyrshah ïa kane ka jingpynbor ban pyndonkam ïa u Aadhaar.
