Shillong, Ïaiong 28 : Ka jingïakhun ha ka sngi Ba-ar jong ka lympung ïalehkai State Boxing Championship 2025-26 ka la long kaba shongshit bha ha ka rynsan ïalehkai kaba long ha Mawlai Mawroh.
Ïa kane ka jingïalehkai kaba saw sngi la pynlong da ka Meghalaya Boxing Association (MBA) ryngkat ka jingkyrshan na ka Directorate of Sports and Youth Affairs. Kane ka jingïakob ka long na ka bynta ki khynnah shynrang bad kynthei ha ka kyrdan jong ki khynnah rit (15-16 snem) bad ki samla (17-18 snem), ha kaba nalor kine la phiah kyrdan shuh shuh katkum ka jingkhia.
Ka jingïakhun ha ka thup ïalehkai jong ki samla kynthei ka la poi sha ka semifinal mynta ka sngi, ha kaba ka Jiasa B Marak na North Garo Hills ka la jop ïa ka Risalang Lawriniang na Eastern West Khasi Hills ha ka kyrdan ïakhun kaba 44-46kg. Ha ka jingïakhun kaba 48-51kg, ka Ekyrpangmeki Sohiong ka la pynliem ïa ka Nishamery Kurbah ha ka jingïakhun semifinal jong ka all Ri-Bhoi, katba ka Laweibaphyrnai Marwein ka la pynliem ïa ka Khamkornaki Ïawphniaw ha ka jingïakhun semi final hapdeng arngut ki nongïakura na Eastern West Khasi Hills. Hadien kata ka Sanphika Mynsong na Ri Bhoi ka la pynliem ïa ka Ibapynsuk Thabah na West Khasi Hills ha ka kyrdan ïakhun jong kiba 54-57kg.
Ha ka jingïakhun jong ki samla shynrang, u Russell Fabian Nongkhlaw na ka Mawshbuit Boxing Club bad u Banchanmiki Pyrtuh na ka Green Heart Boxing Club ki la jop ha ka semi final ha ka thup ïalehkai kiba 45-48kg. U Amethyst Synnah na West Jaiñtia Hills bad u Samuel Sohphoh na Ri Bhoi ha ka thup ïalehkai kiba 48-50 kg, u Nineseviersius Suchiang na West Jaintia Hills bad u Kibanroi Syngkli na Eastern West khasi Hills ha ka thup kiba 50-55 kg bad u Marleki Suchiang (WJH) bad u Erickson Kahit (East Khasi Hills) ha ka kyrdan 55-60kg.
Ha ka thup ïakhun jong ki Junior Boy’s kata ha ka quarter final la sakhi ïa u Arush Biswa (Noble Art Boxing Club), Eddieferson Wahlang (GHBC), Pyndapkupar Marwein (EWKH), Nambearo Sangma (West Garo Hills), Freedy Marngar (EKH), Ryan Lyngdoh (GHBC), Aaron T Sangma (WGH) bad Arkimanbha Rimen (EKH), kum ki nongjop ha ki kyrdan jingkhïa ki bapher bapher.
