Sngewkhia ba ïaibteng ka jingïaumsnam ha Manipur, bun kiba la duh ei ka jingim

Shillong, Ïaiong 27: Ka North East Students’ Oraganisation (NESO) kala dawa ïa ka jingtuklar ba mardor, ba leh hok bad haba shit haba shai ban tehlakam noh ïa ka jingnangheh ki kam ïa umsnam ha Manipur, haba pynpaw ïa ka jingsngewkhia kaba jur ïa ka jingïai jia ki kam ïaumsnam hapoh ka Jylla.
Ha ka kyrwoh ba pynmih ha ka sngi Nyngkong, ka NESO kala pynpaw ba ka sngewkhia kaba jur halor ka jingïai jia ki jingkulmar bad jingiaumsnam kiba bteng ban jia ha Manipur.
“Ka Seng ka sngewsih jur ïa ka jingbteng kine ki jingjia kiba sngewsih, ha kaba ka jingim jong ki lui lui la shu duh noh bad ka jingnang iap ka mynsiem ban ïa im suk im sain ryngkat lang” ong ka kyrwoh.
Haba shim ïa ka jingthombor ïa ki nongshongshnong kum ka jingsngewkhia kaba jur ha ka jingsngew para briew, ka NESO ka ong “Kine ki kam umsnam ba ïai jia pyrshah ïa ki nongshongshnong ba khlem tiar, ka pyni ïa ka jingsngewkhia kaba jur bha, kaba ktah ïa ka tynrai jong ka burom briew, ka jingshngaiñ bad ka hok ba kongsan ban im ha ka jingsuk.”
“Ki jingïausnam ba dang ïai bteng, kala pynsyllang shikatdei eh ïa ki longïing longsem ki bym lah niew shuh bad kumjuh ruh ïa ka imlang sahlang, kaba ieh shadien ïa ka dak ka jingsngewsih, ka jingtieng bad ka jingbym thikna” kala bynrap.
Ka Seng ka phah ïa ka jingsngewlem sha baroh ki Longiing kiba la duh noh ïala ki baieid bathoin ha kane ka jingïakynad kaba la neh la slem bha bad ka ïeng ïatylli lang bad man ki lanot kiba shah ktah ha kane ka jinglong jingman ka bym itynnad.
Haba buh jingkylli ia ki kam bala leh da ki bor Sorkar, ka NESO kala ong “Ha kane ka por, ka seng ka shem ba ka long kaba donkam ban buh jingkylli ia ka jingbym lah jong ki bor ka Sorkar Jylla bad Sorkar Pdeng ban tuklar bha jai bad ban pynkut noh ia kane jingeh kaba la slem bha, kaba la iaid da ki snem”.
“Ka jingbym lah ban wanrah pat ïa ka jingsuk bad jinglong jingman kumba ju long, ka pyni ïa ka jing bym don ka jingsngewkhia ha ka synshar khadar bad ka jingkitkhlieh” kala ong.
“Ka NESO ka dawa ïa ka jingtuklar ba mardor, ba leh hok bad ba leh haba shait ban pynkut noh ïa ka jingnang heh kane ka jingiaumsnam.Ka long kaba donkam ba dei ban pynioh ïa ka jingbishar kaba hok khlem ka jingpynslem” ong ka kyrwoh.
“Kito kiba donkti ban leh ïa kum kine ki kam ba shyrkhei ki dei ban shah tynrong ïa ka jingbahkhlieh” kala bynrap.