La bthah ka sorkar ïa ki bor pynïaid District ban husiar bad peitngor lada jia ba lyngshop ki bor mariang : Lahkmen

Shillong, Iaiong 27: U Myntri Sorkar uba khmih ïa ka tnad Revenue and Disaster Management u Bah Lahkmen Rymbui ula ong, ba ka jylla kala long kaba la pynkhreh lada jia ba don ka jingwan lynshop ki bor mariang bad la bthah ïa baroh ki bor pynïaid District ba kin long kiba husiar bad kiba peitngor.
“Ka Sorkar Meghalaya bad ka kynhun jongka Disaster Management ki la long kiba la pynbiang bad pynkhreh ban shim khia ïa kino kino ki jingjia bad kaba kham kongsan eh ka dei kumba ngi tip, da ka jingdon ki kor teknoloji ngi lah ban tip lypa hashwa” ong u Bah Rymbui haba ïakren bad ki nongthoh khubor mynta ka Lah Sngi U Blei.
Ula ong, ba ym don ïa ki jingtip ne kaiphod kumba ka long mynta ha kylleng ki bynta jong ka jylla, hynrei ki kynhun ne Response Team ki dei kiba la sdang pyntreikam. “Kane ka kynhun, la ka dei na ka ophis jong u SDO ne DC ha kylleng jong ka Meghalaya ka dei kaba la pyntreikam kaba la peitngor ban shim khia ïa kino kino ki jingjia kiba mih” ula ong.
“To ngin ïa kyrmen ba kan ym don ka jingjia hynrei baroh ki kynhun kiba ïadei bad ka jingwan lynshop ka bor mariang ki dei kiba la pynkhreh lypa”. ong u Bah Rymbui uba la banjur ruh ban shim khia mardor haba don kino kino ki jingjia ka dei kaba la pynbeit ryntih bad ki bor pynïaid district ki dei kiba la shah pynkup bor ban kin shim khia mardor da ka jinglaitluid.
“Ki district magistrate kila shah pynkup bor kum ki Chairman jong ka Disaster Management ban khmih ïa ki jingjia hapoh jong ka district. Kumta kam dei eh ïa ngi ha ka ‘State Level’ ban peit ïa kitei ki kam” ula ong.“Ka Disaster Management Rules ka la pynkup bor ïa ki district magistrate ba kin leh lut baroh ïa kaei kaba donkam bha” ula bynrap.
Ha kaba ïadei bad ka jingdon jong ki briew, u Myntri ula ong, “Ngi lah long kiba la pynkhreh bha ïa ki jingdonkam, la ka dei ki briew namar ba ka jingwan lynshop ka bor mariang kam dei tang ïa ka sorkar. Ngi dap da ka jingkmen ba ki paidbah ki la ai ka jingïatreilang kaba pura bad ngi don ïa ki kynhun na ka Home Guards, Pulit, Fire Service bad baroh kine ki kynhun ki dei kiba la peitngor bad husiar bha” ula ong.
“Kaba kham kongsan eh, kaba nga sngewkmen ka dei ba ki paidbah ka Meghalaya ki la ai bha ïa ka jingïatreilang ban ïakhun ïa kino kino ki jingwan jia jong ki jingjia” ong u Bah Rymbui.
Ula pynshai ba ka Disaster Management ka la ïaid palat ban ïa ka jinglong jingman ka suiñbneng, ula ong, “Haba ngi kren shaphang ka jingwan lynshop ka bor mariang, kam dei tang namar ba slap. Haba ngi khmih ïa ki jingjulor, ngi hap ruh ban peit la kane ka kynroh ne ki lum ki long kiba skhem ne em, hato lyngba ka jingpom ïa ki dieng ki siej kan ktah ne em ïa ka rukom pynïaid ïa ki kam kiba ïadei bad ka jingshah pynjulor, ka dei kaba don bynta ïa kiei kiei baroh”.
“Haba ngi kren shaphang ka jingjulor kam dei tang shaphang u slap, kam dei tang ïa u jumai ne kiei kiei namar ki don ruh ki jingjulor kiba la thaw hi ruh da u briew ne ki aksiden kiba lah ban jia” ula ong.
Ha kaba ïadei bad ka por jong ka jingbhah tyngka, u Bah Rymbui ula pynpaw ba kane ka dei kaba la ïaid ha ka lynti da kaba bynshet ha ki tnad. “Kumba nga lah ong ha phi, ngam don ïa ki rekod hynrei ki Deputy Commissioner ki dei kiba la pynkhreh pura ban ïakhun, lada ka don kano kano ka jingduna jong ka jingbhah tyngka ki lah ban phah da ka jingthoh sha ka sorkar jylla khnang ba kan ïoh ban leh noh mardor ïa kaba donkam” ula ong.
“Ban khmih ïa ka jingjulor kam shong tang ha kawei ka tnad hynrei ngi lah bate ïa baroh kiei kiei ban ïohi ba kin lah ban shimkhia bad leit mardor sha ki paidbah kiba la shah ktah” la bynrap u Myntri Sorkar.