Hadien ba la pynduh ka laisen bad contract, dang thep tender ka NESS ha ki tnat, kynnoh ka KHNAM

Shillong, Ïaïong 27: Ka North East Security Service (NESS) kaba dei ka karkhana kaba buh ïa ki briew ban ap pahara hapoh jylla Meghalaya, khamtam na Nongbah Shillong kadei kawei na ki karkhana kaba la shah buh dak ïong hapoh ka KHADC dangshen bad haduh kine ki sngi halor ka jingshah kynnoh ba ka la pyndonkam bakla ïa ka laisen khaïi jong ka, kaba la ïoh napoh ka KHADC.
Hynrei halor kane ka jingshah pynduhnoh ïa ka laisen khaïi bad ka jingshah buh dak ïong, kane ka company la kynnoh ba ka dang pyntrei beit ïa ki kam jong ka hapoh kane ka nongbah Shillong.
Lyngba ka kyrwoh khubor ba la phah da ka Khun Hynñiewtrep National Awakening Movement (KHNAM) sengkmie, lyngba u Working President u Bah Thomas Passah u la ïathuh ba dangshen u Chief Executive Member (CEM) ka KHADC u Bah Winston Tony Lyngdoh ha ki lad pathai khubor ula pyntip ba ka KHADC ka la dep ai dak iong ïa ka NESS, ka karkhana ba na jylla Assam kaba la pynïaid ïa ka kam ban pynbiang ïa ki kam shakri ban pahara sha kiba bun ki tnat kiba don ha ka jylla bad khamtam ha nongbah Shillong.
“Kane ka karkhana ka la shah ai dak ïong halor ka jingkynnoh ba ka la pynkheiñ ïa ka aiñ khaïi da ki bar jylla ne ka Trading by non- Tribal Regulation Act, 1954 bad la ïoh jingtip ruh ba ïa ka laisen khaïi ba la ai sha kane ka karkhana na ka bynta ka kam contract ha KV Laitkor ka la dep ban pyndam, hynrei ngi la ïoh ka jingtip ba kane ka karkhana ka dang ïa shim bynta ha ki jingkhot tender ba la shon bad pynmih da kiba bun ki tnat,” pyntip u Working President ka KHNAM u Bah Thomas Passah.
Ka party ka la ïathuh ruh ba kane karkhana haduh mynta ka dang shim bynta bad ka la long ruh kaba la ïoh ka jingibit ha ka tender ba la shon bad pynmih da ka KV Shillong Peak.
“Kumta halor kane ngi la pyntip ïa kane ka jingjia sha u CEM ka KHADC da ka jingkyrmen ba kin shim kam mardor pyrshah ïa kane ka karkhana,” kynnoh shuh shuh u Bah Passah.