Peit bniah ka sorkar ïa ka jingshna ña ka surok Shillong-Dawki ban lait ki briew na ka jingma
Hadien ka jingïap ki arngut dang shen ba shah btep ha ki maw bad kyndew
Shillong, Iaiong 27: U Myntri uba khmih ïa ka Tnad Revenue and Disaster Management u Bah Lahkmen Rymbui ula pynpaw ïa ka jingsngewkhia halor ka jingtwa bad jinghap ki mawbah kaba la lam sha ka jingkhlad jong ki arngut ki briew hynrei ula pynpaw pat ïa ka jingsngewhun halor ki sienjam kiba la shim da ka sorkar ban ïaleh ban pynkloi ha ka ban shna pyndep noh ïa ka surok Shillong-Dawki.
“U SDO ka Pynursla ula dep ban ai ïa ka por bad sa shisien bad ka jingmaham bad ka jingpyrkhing bad kaei kaei kaba la jia ka long kaba sngewsih” ong u Bah Rymbui, uba long ruh u MLA ka UDP na Amlarem, hynne ka sngi Nyngkong.
Ula pynpaw ba lah dep bthah ban pynlong ïa ka jingtohkit ne Inquiry halor katei ka jingjia. “Nga dap da ka jingkmen ba ka sorkar ka la bthah ïa u SDO ban tohkit halor kitei ki jingjia” ula ong.
Ha kaba ïadei bad ka jingtrei ïa ki kam ha ka surok bah, u Myntri ula ong “Dang shen nga lah ïohi ïa kawei ka kynhun kaba pyntrei ïa ka surok bah khamtam ïa ka Shillong-Dawki ka la shim ïa ki sienjam ban peit lypa ruh ïa kiei kiei kiba lah ban wan jia bad dei halor kane ngi lah pynduh noh ïa kito ki lum ha Mawlieh.”
“Ngi kyrmen ba da ka jingïatreilang hapdeng ki bor pynïaid district bad ki kynhun kiba pyntrei ïa ka kam ki dei ban don ban shim khia ïa kane ka jingeh kaba phi lah kren ne pynsngew” ula bynrap.
Halor ka jingkylli, u Bah Rymbui ula ong, “Ngam sngewhun namar ba ngi lah duh ïa ki jingim briew, hynrei nga sngewhun pat ki sienjam kiba la shim da ka sorkar ban peit ba dei ban shna pyndep ïa ka surok bad kaba kham kongsan eh ba kan ym don shuh shuh kano ka jingmih jong ka jingjulor”.
“Hadien ba ka la don ka jingjia jong ka jingjulor, nga sngewsih bha ban ïohi ba kum kitei ki jingjia ki wan jia” ula ong. Ula kyntu ban long kiba husiar ha kaba ïadei bad ki projek ki ban dang wan.
“To ngin ïa kyrmen ba baroh ki kynhun kiba pyntrei ïa ka kam bad ka sorkar ruh ka dei ban shim ba kum kitei ki jait jingjia kim dei ban ïai jia shuh haba ki pyntrei ïa kino kino ki projek ha ka bynta jong ka jylla Meghalaya,” la bynrap u Bah Rymbui.