New Delhi, ïaiong 27: Ki jingtyrwa na ka bynta ki khusnam Padma Awards 2027 ki ban sa pynbna ha ka sngi rakhe ïa ka Republic Day, 2027 ki la sdang naduh ka 15 tarik u Lber, 2026. Ka tarik ba khatduh ban thep kyrteng na ka bynta ki khusnam Padma Awards ka long ha ka 31 tarik Naitung, 2026. Ka jingtyrwa na ka bynta ki khusnam Padma Awards kan long tang lyngba ka lad online ha ka rynsan Rashtriya Puraskar (https://awards.gov.in).
Ki Padma Awards, kata, ka Padma Vibhushan, Padma Bhushan bad Padma Shri, ki dei napdeng ki khusnam ba heh tam ba ki briew shimet jong ka ri ki lah ban ïoh. La sdang ha u snem 1954, ïa kine ki khusnam la pynbna ha ka sngi rakhe ïa ka Republic Day man la u snem.
Ka khusnam ka ïaleh ban ithuh ïa ka ‘jingtrei ba kyrpang’ bad la ai ïa ka na ka bynta ki jingjop/jingshakri ba kyrpang ha baroh ki kam, kum, ka jingsaiñdur, ka thoh ka tar bad ka jingpule, ka kam ïalehkai, ka jingsumar, ka jingtrei ha ka imlang sahlang, ka science bad engineering, ki kam paidbah, ka kam khaïi bad ka kam karkhana bad kiwei kiwei. Baroh ki briew khlem da pynïapher ïa ka jaitbynriew, ka kam, ka kyrdan ne shynrang ne kynthei ki lah ban ïoh ïa kine ki Khusnam.
Ki nongtrei sorkar kynthup kito kiba trei bad ki PSU, laitnoh ki Doktor bad ki Scientist, kim lah ban ïoh ïa ka khusnam Padma Awards.
Ka Sorkar ka thmu ban pynkylla ïa ki khusnam Padma sha ka “People’s Padma”. Baroh ki nongshong shnong, namar kata, la kyrpad ban ai kyrteng/jingai jingmut, kynthup ïa ka jingai kyrteng hi. Lah ban pyrshang ban ithuh ïa ki briew kiba don sap kiba ka jingtbit bad ki jingjop jong ki ka dei hok shisha ban ïoh jingithuh na ki kynthei, ki bynta kiba kham tlot jong ka imlang sahlang, ki SC & ST, ki briew kiba don jingduna ha ki dkhot met bad kiba trei shitrhem na ka bynta ka imlang sahlang.
Ki jingthep kyrteng /jingai jingmut ki dei ban don baroh ki jingtip ba ïadei ba la batai ha ka rukom ba lah ban ïoh ha ka rynsan ba la kdew haneng, kynthup ïa ka jingthoh kaba ai jingbatai (bym tam ïa ka 800 kyntien), kaba pynpaw shai ïa ki jingjop/jingshakri ba kyrpang jong u briew ba la ai jingmut ban ïoh khusnam.
Ïa ki jingtip ba bniah halor kane lah ban ïoh ruh hapoh ka phang ”Awards and Medals’ ha ka website jong ka Tnad kam Pohïing (https://mha.gov.in) bad ha ka runsanPadma Awards (https://padmaawards.gov.in ). Ki aiñ bad ki kyndon kiba ïadei bad kine ki khusnam lah ban ïoh ha ka website ryngkat bad ka link https://padmaawards.gov.in/AboutAwards.aspx.
