Shillong, Iaiong 27 : Ki Pulit ka North Garo Hills ki la ïoh pynpulom ïa ka jingpyrshang rahbor bad ïoh pynlait im ïa uwei u nongkhaïi hehspah tang hapoh shiteng kynta ba u shah rahbor.
Kat kum ka jingïathuh u Superintendent of Police ka District, kane ka jingjia kala jia ha ka 25 tarik Iaiong ha ka por 3 baje janmiet ha ka shnong Bolsong.
U ïathuh ba ki Pulit ka Bajengdoba Police Station ki la ïoh khubor na ki nongshong shnong ka thaiñ Bolsong halor ka jingdon ki briew ki bym lah ban ithuh, kiba rahbor ïa u nongkhaii ha kawei ka kali Maruti Ertiga ML08-K-5869.
Ki Pulit mar mar ki la pynïeng ïa ki jaka talasi ha Mansinggre bad ha ka por 3:30 baje janmiet, ïa kane ka kali ha ryngkat ka thuk thuk jong une u nongkhaïi ba la niah da uwei na ki nongrahbor, lah ïoh ban bat da ki Pulit, kiba la lap ruh ïa une u nongkhaïi napoh ka kali khlem kano kano ka jingmong ne jingmynsaw.
Ha ka jingtohkit, la lap ba lai ngut ki runar kila bat ïa une u nongkhaïi ha ka surok Bolsong-Agia da kaba pynbor ïa u ban ïeng bad hadien ki la kurup jubor ïa ka thuk thuk bad mobile phone, nalor ka jinglute ïa ka song pisa ba 30,000 tyngka. Kine ki runar ki la patan jubor ïa u hapoh ka kali katba uwei pat ula ñiah ïa ka thuk thuk. Une u nongkhaïi ula ïoh hylla, kaba la ïoh sngew da ki paidbah kiba la pyntip pat mar mar sha ki Pulit.
Kine ki lai ngut ki nongrahbor ki kyrteng u Tenggra Ch. Marak alias Togan (36), ba na South Garo Hills, Dipon D. Sangma (38), na West Garo Hills bad u Lovingson R. Marak (33), uba dei hi na West Garo Hills.
Ha ka jingtohkit, u Tenggre Marak ula kam ba u don jingïadei bad ka seng bala ai kyrteng ka United Garo People’s Forum, watla ki pulit kim pat pynthikna kane ka seng ka dei kaba kumno.
Ki pulit ki la register ïa ka case ha Bajengdoba Police Station ha ki kyndon bapher bapher ka Bharatiya Nyaya Sanhita (BNS) bad ka jingtohkit mynta kala ïaid shakhmat.
