Shillong, Naitung, 15: Ka Meghalaya Pradesh Trinamool Youth Congress ka la beiñ ïa ki MLA kyntiap seng da kaba ong ba ki dei ki nongïalam ki bym don ka jingmut kaba skhem bad kiba peit tang ïa ka jingmyntoi shimet ym na ka bynta ka jingmyntoi bad ka bha ka miat jong ki paidbah.
“Ki la pyrshang ban wad ïing hangto kim ïoh, shawei sha ar ruh kim ïoh, sha kaba lai ruh kim ïoh, ban wan phai biang (sha ka Party) ruh ki la sngew lehraiñ. Ki don katto katne ki nongïalam (ki ban phet na ka party) bad lada kita ki nongïalam kim skhem jingmut ngim donkam shuh ïa ki,” ong u President ka MPTYC u Bah Fernandez S. Dkhar ha ka ka jingïakren bad ki lad pathai khubor ha ka sngi Thohdieng.
Kane ka jingbeiñ jong u President ka MPTYC ka long hadien ba la mih ka khubor shaphang jong ki saw ngut ki MLA ka All India Trinamool Congress, Meghalaya kiba la thmu ban phet noh na ka party kiba kynthup ïa u Bah HM Shangpliang, u Bah Shitlang Pale, u Jimmy Sangma bad u Marthon Sangma hadien ba ki la pynïasoh bad ka AITC ha u snem 2021 hapoh ka jingïalam jong u Dr. Mukul Sangma.
“Ngi donkam tang ïa ki nongïalam kiba ïohi jngai namarba ka Jylla jong ngi ka la mad ha kine ki saw snem bad balei ki dang kwah ban leit ïasnoh bad ki Party kiba don hapoh ka Sorkar Meghalaya Democratic Alliance (MDA) mynta,” la kynthoh u Bah Dkhar.
“Ka lah ban dei na ka bynta (ka jingmyntoi) jong ki shimet. Namarba ngi don hapoh ka Liang Pyrshah ngin pyrshah bad mynta pat ki kwah ban leit ïasnoh (bad ka Sorkar) ngam lah ban ong eiei. Nga don tang ban ong kumne, ngi donkam tang ïa ki nongïalam kiba neh jingmut hynrei ym ïa ki nongïalam kiba phet bad kiba kynthih shane shatai,” u la ong.
