Shillong, Naitung 15: Ka North Eastern Hills University Students Union(NEHUSU) mynta ka sngi ka pynpaw ïa ka jingpyrshah jur ïa ka jingthmu jong ki bor pynïaid jong ka NEHU ban pynduh noh ïa ki lai tylli ki bhah kyrpang kiba ju mang na bynta ki trai jylla naduh ba seng ïa ka NEHU bad ka jingpyrshang ban batai bakla jong ki bor ka NEHU ïa ki Rule bad ki Ordinance jong ka NEHU.
Haba kren bad u Mawphor u Advicer jong ka NEHUSU u Samla Comingstar Kharsyntiew u la ïathuh ba ki bor pynïaid jong ka NEHU ki thmu ban pynduh ïa ki lai tylli ki bhah kyrpang ba kynthup 10% na bynta ki nongshong shnong jong ka jylla, 10% na bynta ki samla kiba pas na ki kolej kiba pynïasoh bad ka NEHU affiliated college bad 5-7% na bynta ki samla pule kiba wan na ki kyndong kynshrot ka jylla kaba ki dang duna ki ba nang ba stad.
U Samla Comingstar u la ïathuh ba ka NEHU ka la thung sop sop ïa kawei ka komiti ban weng noh ïa ki bhah kyrpang kiban ai jingmyntoi ïa ki trai jylla. Shuh shuh u la ïathuh ruh ba ki bor pynïaid ka NEHU ki pyrshang ban ïalam bakla da ka jingbatai ba lamler halor ki kyndon ba ka bhah kyrpang kaba ki kyndon ka NEHU ki kdew shai ba ïa ka 10% ka bhah kyrpang ki pyrshang ban batai bakla da ka ong ba ka 10% ka bhah kyrpang kadei kaba ka NEHU ka bakla ban pyntreikam namar ha ka jingshisha ka dei 10 mark.
“Hadien ba ngi la kdew na ki rule bad ki ordinance ka NEHU ban pynshisha ba kaei kaba u Vice Chancellor(VC) ka long kaba bakla, u VC u sngewthuh ba um lah shuh ban ïalam bakla u shu pynphai nia da kaba ong un sa peit kat kum ka jingai jingmut ka komiti kaba u thung” ong u Samla Comingstar.
“Ngi kwah ban ai ka kyrwoh kaba shai ïa kito ki dkhot ka komiti ba wat ktah ïa ka bhah kyrpang kaban pynioh jingmyntoi ïa ki samla pule ka jylla lada phi dei mano mano ruh” bynrap shuh shuh u Samla Comingstar.
U Samla Comingstar u la kyntu ruh ïa ki samla pule ka jylla bad ka jaidbynriew khamtam, ki rangbah bad ki riew shemphang ba kin ieng pyrshah ïa kane ka jingleh buit tuh ban pynduh jingmyntoi ïa ki samla pule trai ri trai muluk.
