Shillong, Naitung 15 : Ka kynhun ki Engineer ka tnad Bording hapoh ka lama jong ka Association of Power Engineers, MeECL ha ka sngi Thohdieng ka la ong ba ka sorkar kam dei satia ban pynbor ba dei ban pyndait beit ïa ki smart meter ha ki iing ki sem.
“Ym dei satia ban pynbor ïa ka ka jingpyndait ïa ki smart meter namar wat ka sorkar India ruh kam shym leh kumta,” ong u President ka Association, u Bah Arju Dkhar haba kren bad ki lad pathai khubor hadien ka jingïalang paidbah.
Hynrei u la ong pat ba ka sorkar ka dei ban kiar ban pyntreikam ïa katei ka projek khyndiat khyndiat.
“Haba phi ong pyndait da ki smart meter hynrei donkam pat da ki nongleit peit meter, kumta kam don jingmut hynrei ka long kumba shu pynbiej ïangi. Phim lah ban pynbiej ïa ki paidbah bad kum ki nongpyndonkam ruh ki dei ban tip ïa kata,” u la bynrap biang.
Shuh shuh u ong ruh ba un pyndait beit da ki smart meter ha iing la jong namar u kwah ban ïohi bad sakhi hi ïa ka jingpyndonkam bording, katno poi bai bording bad kiwei kiwei.
Haba pdiang sngewbha ïa ka rai jong ka sorkar ban pynïakhlad ïa ka kam Chairman bad Managing Director jong ka MeECL, u President u la ong ba lada don u CMD uba biang ha ka Generation, Transmission bad Distribution kadei ka sienjam kaba ki kubur lang.
“Da kaba don kum u Myntri Bording kum u Chairman MeECL un long kum ka jingkieng hapdeng ki Myntri Sorkar, ka sorkar bad ka MeECL kumjuh ki tnad jong ka. Kane kadei ka sienjam kaba ngi kwah ban ïohi ba kan ïaid shakhmat,” u la bynrap biang.
