Shillong, Naitung 15 : Kito ki dukan kiba ju die ïa ka dohsyiar ha ki dukan jong ki, kin hap ban leit sha ka jingshah hikai ba la pynbeit da ka Commissionerate of Food Safety ka sorkar jylla ba kin tip kumno ban buh ïa ka doh ha ki dukan jong ki.
“Na ka liang ka Food Commissionerate ka la pynbeit ba ka jingai jinghikai kan long ha ka 19tarik mynta u bnai ha Lawmali Community. Kumta, ngi kyntu ïa baroh kito kiba die dohsyiar kin poi lang sha katei ka jingai jinghikai,” ong u Bah Wanshai Kharchandy, President All Meghalaya Poultry Supplier and Retailer Association haba kren bad ki lad pathai khubor.
Katkum ka jingïathuh jong u, mynta ki dukan die doh syiar ki hap ban bud pyrkhing bha naduh ka rukom shna ïa ka jaka ban buh ïa ka doh ha kaba hap ban ker baroh lai dong da ka ïit. U la ong ruh ba mynta kim lah shuh ruh ban wah ïa ka doh hynrei ki hap ban shu buh beit ha katei ka jaka ba la shna kyrpang.
Halor kane, u ong ruh ba katei ka sienjam ba la bthah da ki bor ba dei peit ka long ban pyntikna ba ka doh kaba ju die ha rud lynti kan long kaba lait na ki tdem kali, na ki pum pum bad na ki jingjaboh ba harukom.
