Byrngem ki trai jaka ba shah ktah ha ka Shree Cement Ltd ban pynlong da ka jingïakhih pyrshah ïa u Doloi & ïa ka JHADC

Khliehriat iaiong 23: U bah Diniwanlad Patwet, uba na Shnongrim East Jaiñtia Hills District, haba kren sha ki pathai khubor mynta ka sngi u la pynpaw bad ong ba na ka liang ki trai jaka kiba shah ktah ha ka jingkam trai ka Company Shree Cement ïa ki jaka, na ka liang ki paidbah ba shah ktah kin pynlong da ka jingiakhih pyrshah ïa u Doloi bad ki dkhot EC jong ka Elaka Nongkhlieh East Jaiñtia Hills District bad pyrshah ruh ïa ka Jaiñtia Hills Autonomous District Council ba balei ki ai ïa ka syrnot NOC ïa ka Company M/s Shree Cement Ltd bad balei ki ai jaka ïa ka company khlem ka jingtip ki trai jaka.
La pynpaw ruh lyngba u bah Diniwanlad Patwet ba ki trai jaka ki ai por ba hapoh hynñiew sngi ka tnat ba dei peit ka dei ban ia pynbeit ïa ki kam kiba ïadei bad ki trai jaka, ki la buh ruh kum ka jingpynkynmaw ïa ki nongmihkhmat kum ka MLA, MDC bad u Doloi elaka Nongkhlieh ba ha ka jingshihsa la pynkupbor ïa ki ba kin ïada iala ki jong ki briew, ban ïada ïa ka khyndew ka shyiap, ym shym la pynkup bor satia ïa ki ban shu die duh ne pynduh pyndam ïa ki jaka ki puta khlem ka jingtip lang ki trai jaka bad lada ka don ka jingleh klet ne leh byn salia ki trai jaka kin shim pat da kawei ka synjam ban ïada ïa ki jaka puta kiba dei ki hok longtrai jong ki kum ki nongshong shnong namar kane ka jaka ka Lum Shyrman ka dei hok ka bynta jong ki bad kam dei satia ka jaka jong ka Shree Cement.
Ki nongshong shnong kiba dei ki trai jaka kiba na Shnongrim elaka Nongkhlieh, East Jaiñtia Hills District, mynta ka sngi ki la leit tur sha ophis jong ka Meghalaya State Pollution Control Board Shillong da ka jingthmu ba ïa kynduh bad u Members Secretary ka MSPCB hynrei ki khlem lah ban iakynduh namar ba um don ha ophis, kane ka jingleit ki nongshong ka dei halor ka jing knieh bad kam trai ka company Shree Cement ïa ki jaka kiba dei ka jaka rep jong ki, mynta ka sngi ki nongshong na Shnongrim ki la buh ruh da ka jingthoh hakhmat u Member Secretary MSPCB bad ki la don ruh haduh 85 ngut kiba la ïa soi kyrteng ha kane ka jingthoh bad ha kajuh ka por ki la pynpaw ruh ka jingpyrshah jur ïa ka public hearing kaba la pynbna da ka tnat Meghalaya State Pollution Control Board kaba tmu ban pynlong ha ka 22 tarik u bnai jymmang 2026, kane ka public hearing ka dei halor ka jingthmu ka company M/s Shree Cement Pvt Ltd ban khlong ïa u mawshun na kawei ka jaka kaba heh 217.394 Hectar kaba khot ka Lum Syrman Limestone Block-A kaba long katkum ka ka public notice jong ka Memo: No MPCB/TB-360/2026/SCL (Block-A)/EJHD/2026-27/4-A, dated: 17th April 2026 ha kaba ka company ka thmu ruh ban buh ïa ka Primary Lumshyrman Limestome Crusher bad Secondary Crusher bad ki nongshong shnong ki la ong ba ia kane baroh la leh khlem da ioh jingbit na ki trai jaka.
U bah Diniwanlad Patwet u la pynpaw shuh shuh da kaba ong “Lada ki bor ba dei khmih kim pynsngap ïa ka jingujor jong ngi, ngin iakhih pyrshah ïa u Doloi bad ïa ki dkhot ka EC bad ngin nang ïaid shuh shuh sha District Council kaba dei ban peit ïa ka hok longtrai jong ngi ïa ka khyndew ka shyiap, kumno ki nud ban ai ïa ka NOC sha ka company khlem ka jingtip ki trai jaka, na ka bynta jong kito kiba ïa donbynta lang ha kaba ai NOC ngin leit ban iakynduh bad pan jingshai ba ha kano ka rukom ki ai ïa ka NOC sha ka Shree Cement”
Na ka liang ki trai jaka ruh ki la pynpaw ba haduh mynta hi kim pat shym la die jaka satia sha kano kano ka company ne sha uno uno u briew shimet bad ki jaka ki dang long hi kumjuh kumba la dep ai pateng ïa ki da ki longshwa naduh mynshwa, ki la buh ka jingkylli ba kumno ki lah ban pynlong ïa kata ka public hearing lada khlem ka jingiasngewthuh ne khlem kano kano ka jingtip lang ki trai jaka? Ha kaba ki la kam ba ki jaka ki dang long trai hi ma ki bad ki la dawa na ka tnat MSPCB ba dei ban pynsangeh noh mardor ïa kane ka public hearing.
Kumjuh ruh u bah Ïohoi Sukhlaiñ u la ong ba ha kaba ïadei bad ka Lum Shyrman ki trai jaka kiba na Shnongrim kin sa leit buddien na ophis jong ka Jaiñtia Hills Autonomous District Council ba kumno ka tnat MSPCB ka pynbna ïa kane ka jaka ha Lum Shyrman ba ka dei ka shnong, namar ha kane ka jaka ym don ïing ym don sem eiei ruh bad kane ka dei tang ka jaka rep jong ki nongshong shnong bad kam dei satia ka shnong kumba la pynpaw da ka tnat MSPCB ha ka public notice.