Shillong, Ïaïong 23: Ka khubor ba la ïoh na ki pulit la ïathuh ba ka Kong Annieta Kharpuri ka la phah ka jingujor ba ha ka 21 tarik mynta u bnai, ki runar bym lah ban ithuh ki la prong hapoh ka dukan jong ka kaba ha Ïew Mawlong, Ïewduh, Shillong, bad ki la tuh ïa ki duma kiba kynthup ïa ki cigarette bad ki pan masala ha kaba ki jinglut jong kine ki tiar ki la kot sha ka T. 70,400/-.
Shuh shuh ha kawei pat ka jingjia, ki pulit ki la ïathuh ba u Durga Skahi u la phah ka jingujor ba ha ka 21 tarik mynta u bnai ha ka por kumba 8.30 baje mynstep, ki runar bym lah ban ithuh ki la tuh artylli ki jingdeng ksiar, nangta ka pisa T. 1 lak napoh ka ïing jong u kaba ha shnong Dongkadiang, Nongmensong, Shillong.
