Shillong, Naitung 15 : U Dr. Aman War DHS ba la shongthait noh jong ka sorkar jylla u la hap ban kit ban bah sa kawei pat ka kam ha ka liang ka jingïalehkai, ha kaba ka Meghalaya Softball Association (MSA) ka la ibit bad thung ïa u kum u President jong ka Association.
Ïa u Dr. Aman War la thung President ha ka jingïalang paidbah ba shisien shi snem jong ka Meghalaya Softball Association kaba la pynlong ha ka 14 tarik Naitung 2022 ha Alelang Hall, Lachaumiere.
Ha katei ka jingïalang la jied thymmai ruh ïa ki nongkitkam na bynta ka samoi treikam jong u 2022 haduh 2025, ha ka jingïadonlang u Bah Finely Pariat uba dei u General Secretary jong ka Meghalaya State Olympic Association (MSOA) bad kiwei kiwei.
Nalor u Dr. Aman War kum u President la thung Working President ruh ïa u Bah Dennis Shabong, arngut ki Vice President ka Kong MN Lyndem bad Kong Y. Jyrwa bad General Secretary Kong Ridahunlin Lyndem.
Kiwei kiwei pat ki nongkitkam ki kynthup ïa u Bah Hiamdor Rapsang bad Kong Darikordor Kharpuri (Joint Secretary), Kong Pristimai Jyrwa (tresurer). Nangta la thung ruh ïa ka sub committee ha kaba ki dkhot ki kynthup ïa u Bah Wankitboklang Syiemlieh bad Kong Jerinda Kharchandy (Technical Committee), Ritu Chettri bad Bah Banskhembha A Lyndem (Selection Committee) bad ka Kong Ibaphira Skhemlon (Tournamnet Committee).
