Shillong, Naitung 15 : Ka Langsning SC ka la kiew sha ka kyrdan ba ar ha ka miej kheñ point jong ka lympung ïalehkai OC Blue Shillong Premier League (SPL) 2021-22 da kaba knieh na ka Ryntih kaba la hiar mynta sha ka kyrdan ba lai. Kane ka la wan hadien ba ka la pynliem da 4-0 pyrshah ïa ka Malki SC ha ka jingïalehkai ha ka sngi Thohdieng ha madan Third Ground, Polo Shillong..
Hashwa ba kine ki ar tylli ki team kin ïa aireng, ka Langsning ka dang kamai 7 point bad ka Malki da 4 point ha kaba ka Langsning ka don ha ka kyrdan ba saw katba ka Malki ha ka kyrdan ba hynñiew. Bad da ka nam jop ba ka la khur ha kane ka sngi ka Langsning FC ka al kiew sha ka kyrdan ba ar da kaba kamai 10 point.
Haba phai sha ka jingïalehkai hapdeng kine ki ar tylli ki team, baroh ar ki la ïoh ban thep kol ha ka jingïalehkai jong ka kylla step. Ka Langsning tang ha ka jingïalehkai ba ïaid lai minit ka la ïoh ka kabu kaba biang bha ban thep kol, hynrei ka bol ba la shut da u Figo Syndai ka la lait salit ban rung shapoh kol.
Ha ka minit ba 10, u Syndai u la ïoh ban pynkhih jar hynrei ym shym la kheiñ kol namar u don ha ka liang ka offside. Ka jingïakhun ka la nang itynnad bad ïakhaid bha, hynrei ka Langsning ym slem na ka jingïai pyrshang bad ñion shakhmat ka la ïoh ban pynkhih jar nyngkong ba la thep da u Arnesius Marweiñ ha ka minit ba 19.
Katei ka shi kol ka la wan lyngba ka freekick ba la shut da u kapten u Kitboklang Pale kaba leit dei noh ïa u dieng kol. Ha kaba kum katei ka por ka bol ka la wanphai biang sha madan ïa kaba la ïoh bat da u Arnesius Marweiñ uba khlem pynlehnoh ei u la thep beit jlang shapoh kol.
U Nongtdu u la thep ïa ka kol kaba ar hadien ba ma u ryngkat u Kynsaibor Lhuid ki la pashat bol lyngba ka jingshut corner. U Nongtdu u la pyrshang thep kol ha kaba ka bol ka la leit dei na u dieng kol bad rung beit jlang shapoh kol. Kane kadei ka kol kaba 50 jong ka SPL mynta ka samoi.
Ka Langsning ka la nang ïoh mynsiem bad khlem da ailad ïa ki jingpyrshang thep kol ka Malki ha kaba u Arnesius Marweiñ u la thep sa ïa ka kol kaba ar bad kaba lai na bynta ka Langsning FC. Ka Langsning FC khlem da ailad ka la nang ïakhun tyngeh bad ha ka jingïalehkai ba la jan kut artad ka kylla step, u Kitboklang Pale ha ka minit ba 40 u la thep ïa ka kol kaba saw.
Na ka jingïoh ban lamkhmat da 3-0, ka Langsning ka la lah da kaba suk ban kyrda na ka jingshah thep kol ha ka kylla miet. Ki rangïalehkai ki la ïakhun tyngeh haduh kaba kut jong ka jingïalehkai bad ka Malki ruh ki la ïakhun triang ban pynphai kol hynrei haduh kaba kut baroh arliang ki khlem ïoh thep kol shuh ha kaba ka Langsning FC ka la pynliem da 3-0 kol.
Kane kadei ka jingïalehkai kaba khatduh jong ka wat ba san bad ka wat ba hynriew kan sdang mynta ka sngi Saitjaiñ ha kaba ka Rangdajied FC kaba don ha ka kyrdan ba saw kan aireng pyrshah ïa ka Shillong Lajong FC kaba don ha ka kyrdan ba hynriew ha ka por 4 baje janmiet.
