Jowai, Ïaïong 22 : Kum ka dak ban rakhe ïaka jingdap 50 snem ne ka Jubilee Ksiar jong ka Amlarem Civil Sub-Division, mynta ka sngi 22 tarik u Ïaïong la pynlong ïaka Nutrition-cum-Health Mela ha Syiem Jingsuk Parish Hall, Amlarem, lyngba ka ophis Child Development Project Officer, ICDS Project Amlarem, West Jaiñtia Hills District.
Kiba bun na ki tnad sorkar bapher bapher mynta ka sngi kila wan ban pynpaw pyrthei ïaki mar ki mata bad ki lad ai jingsumar lyngba ki stall bala buh kyrpang, ha kaba ki paidbah kila ïoh shibun ki jingtip kiba khambniah.
Na ka liang ka SDO ka kong Vevotolu Kezo,IAS kum ka kongsan haba ai jingkren kala pynpaw ka jingsngewkmen ban ïadonlang ha kane ka sngi, kala ai ruh ka jingïaroh ïa ka jingwan ïashim bynta shitrhem jong ki paidbah ka thaiñ bad ki tnad sorkar.
Kala pynpaw ka jingkhublei halor ka jingpynlong ïa kum kane ka prokram kaba ïarap ban kyntiew ïa ka imlang sahlang bad ban pynïoh ïa ka met ka phat kaba koit ba khiah bad kumjuh ïa ka jingmut jingpyrkhat kaba khlaiñ.
Shuh shuh kala ban jur ïaka jingdonkam jong ki 1000 tylli ki sngi naduh ka por ba kha khun haduh ka rta kaba ar snem, ka long ka bynta ba kongsan eh ban sumar ha bam ka dih bad ka jingkoit jingkhiah hapdeng ka kmie bad i khunlung.
Kala pynsngew ruh ïaka jingkordor jong ki jait jingbam Nutrition kiba lah ban tei ïa ka met ka phat bad kala ban jur ïa ka jingdonkam ban ai tika haka por kaba biang.
U Dr. Arvin Khonglah Sub-Divisional Medical and Health Officer, ula pyntip ba ka tnad ka koit ka khiah kala buh bun tylli ki Stall kiba peit bniah ïaka koit ka khiah jong ki samla pule naduh ki khmat, ka jingpeit bniah ïaka jingduna snam bad haka pyrkhat pyrdaiñ, ula pynsngew na ka bynta ki jingbam kiba tei lah ban ïoh lyngba ka ICDS bad na ki SHG.
Kum ki samla pule ki dei ban ïoh ïaka bor met koit ka khiah bad kumjuh haka jingmut jingpyrkhat namar ka long kaba donkam eh haka jingim jong ki. Kumta donkam ban biang ka bam ka dih bad ban peit bniah man ka por ïa ka koit ka khiah khnang ban ïoh ka jingïarap haka por kaba biang. Ula ai jingmut ruh ban ïoh ïa ki jingbam ba biang lah ban leit mih sha ki nongtrei ka ICDS bad SHG.
Ka kong Iarisalang Pohshna, kaba dei ka Lady Supervisor ka ICDS, Amlarem, kala pynpaw ïa ka jingdonkam ban pynlong kum kane ka prokram bad pynïasoh lang ïa ki tnad bapher bapher bad ka long ruh ka prokram kaba don jingmut.
Kala pyntip ba ïa kane ka Nutrition cum Health Mela la pynlong kum shi bynta ban pynsaphriang ïa ka jingtip halor ka koit ka khiah, ki jingbam ba tei bad ki skhim treikam jong ka sorkar.
U Fr. U Peter uba dei u Principal jong ka Syiem Jingsuk Higher Secondary School u la wan ban ïashim bynta ha kane ka prokram. Katba ïa ka jingai jingmut ba kyrpang halor ka koit ka khiah, ka bor pyrkhat ryngkat bad ka jingïada na ka jingpynïap ïalade la batai da ka kong Shelmi Syngkon.
Ha kane ka sngi la sam ruh ïa ki jingbam ba tei met sha ki longkmie kiba armet, kumjuh ruh la pynkup burom ïa ka Rimika Pohshna na Pdengkarong kaba ai jingshakri haka kam Anganwadi. Katba ïa ki kyntien ai khublei la ïoh naka kong C. Shylla, ka Child Development Project Officer, Amlarem.
