Jowai, Naitung 15: Ka jingïalehkai phutbol ‘5th Debo Shullai Memorial Trophy’ 2nd Division Football League Cum Knockout Tournament-2022 bala pynïaid da ka West Jaiñtia District Sports Association (WJDSA) kaba la long mynta ka sngi ha madan Kiang Nangbah Stadium Jowai.
Haba phai sha ka jingïakhun hapdeng ka Caroline Colony pyrshah ïa ka Lion Sports & Youth Affairs kala long kaba ïakhait bha bad ha ka jingïakhun jong ka kylla step kitei ki ar kynthun kila ïoh ban thep mar kawei 1-1 kol.
Ïa ka kol ba nyngkong la thep shwa da ka Lion Sports and Youth Affairs ha ka minit ba 4 da u rangïalehkai jong ka u Heipormi Dkhar, hynrei na ka liang ka Caroline Colony kala ïakhun dohïap ban pynphai kylla ïa katei ka shikol bad dei ha ka minit kaba 16 na ka liang u Famous Lyngdoh ula ïoh ban pynkhih ïa ka jar.
Haba wan ban bteng ïa ka jingïakhun jong ka kylla miet baroh ar kynhun kila pyrshang ban ïalehkai bha kiba la sei lut ïa ki sap ki phong ïalekai jong ki hapoh madan, hynrei haduh ba kut jong ka jingïakhun kila ïasam noh da mar shi point.
Ka jingïalehkai lashai ka sngi (Saitjaiñ) 16 tarik kan long hapdeng ka Khliehïongriang pyrshah ïa ka NSA ha ka por 3 baje nohphai sngi.
