Jur ka jingpang khieshit, pynhiar bad jyrhoh ha ki 3 shnong ha SWKHs hiar ki Doktor bad ki bor Pulit

Shillong, Iaiong 20 : Ha kine ki khyndiat sngi ba la dep ka jingpang khie shit, jyrhoh bad pynhiar ka la jur bha ha ki lai tylli ki shnong ha South West Khasi Hills kata ka Langpa, Newphanwer bad Phudumiap.
Kane ka jingpang ka la sar naduh ki khynnah ba arsnem shiteng shaneng. Namar ba ki dei ki shnong kiba la jngai bha bad bun ki long ïing longsem kiba duk, kim don lad ban wan phah sumar sha ki hospital. Haba u Myntri Rangbah u Conrad K Sangma u la ïoh jingtip halor kane ka jingpang ha kitei ki lai shnong mar mar u la phah ïa ka kynhun ki doktor ban hiar leit ai dawai ïa kiba kem pang.
Hadien ba ki la ïoh ia ki dawai ka jingpang ruh ka la sdang ban hiar noh. La ïathuh ruh ka PHC kaba jan tam sha kitei ki shnong ka dei ka Wahkaji PHC hynrei namar bym don surok ki shem shitom ban pynkit ïa kiba pang. Nalor kata wat tang ki ASHA ruh kim don satia ha kitei ki shnong.
Mynta ka sngi na ka liang ka Ophis jongka tnad Pulit South West Khasi Hills ki la hiar sha ka shnong Langpa. Ki la ïoh ban sam ïa ki Chocolate, Umsoh Fruity bad da ka jingïarap u Myntri la phah khot ïa ki khynnah, ki kmie ki kpa na ka shnong New Phanwer bad Phudumiap ban ïawan sha ka SSA Skul kaba ha Langpa. ïa ki khynnah na kitei ki shnong ryngkat ki kmie ki kpa ruh la ïoh ban sam ïa ki chocolate bad Umsoh Fruity. Ki khynnah kiba wan kim duna ïa ka 70 ngut ei ei bad baroh ki la ïoh bynta lang ïa kitei ki jingbam. La ïathuh ruh ba ki Pulit ki la lap ruh ba ki khynnah na kitei ki shnong ruh ki la koit mynta.