Pat pur ha Meghalaya tangba peitngor bha kyntu u Myntri khamtam ïa ki Distrik ha khappud

Shillong, Ïaiong 20 : Haduh mynta ka Jylla kam pat ioh pdiang satia ban don ka jingphriang jong ka jingpang Niangpyrsit (Measles) ha ka jylla wat hadien ba ki la don haduh 100 ngut ki khunlung kiba ïap na ka jingphriang jong katei ka jingpang ha Bangladesh kaba dei ka ri ba marjan bad ka Jylla, ong u Myntri ka tnad ka Koit ka Khiah ka Jylla haba kren bad ki lad pathai khubor.
“Baroh phi tip ba ka don ka jingphriang jong ka jingpang Niangpyrsit ha ka ri ba don khappud bad ngi ka Bangladesh kaba ki la don haduh palat 100 ngut ki heprit kiba la khlad na ka daw kane ka jingpang,” ong u Myntri.
Ha kajuh ka por u Myntri u la ïathuh ba ka jylla bad kumjuh ka tnad ka shimkhia bha halor kane da kaba bthah ïa baroh ki distrik kiba don ha khappud ba kin long kiba peitngor.
Katkum ka jingïathuh jong u, ka tnad hi ka la bthah ïa baroh ki ophisar ba kin long kiba peitngor ha kano kano ka por watla kam pat don satia kano kano ka kaiphod.
U Myntri u la ïathuh ruh ba ka tnad ka shimkhia bha ïa kane ka bynta da kaba buddien bniah bad baroh ki distrik ba marjan kiba don ha khappud bad katei ka ri ba marjan. “Tangba haduh mynta, ngim pat ioh kano kano ka report,” u la ong.