Shillong, Iaiong 20 : Ka BJP kan sa long ka seng saiñ pyrthei ka ban leh ïa ka bynta kaba khraw ha ka jylla Meghalaya ha u snem 2028 bad kan bteng ban pynïar ïa ki dienjat ki jongka ha kylleng jong ka thaiñ shatei lammihngi, la ong u National Secretary ka BJP uba khmih ruh ïa ka Meghalaya u Anil Antony mynta ka sngi.
“Ha u 2028, phi lah ban khmih lynti ba ka BJP kan kylla long kum ka seng saiñ pyrthei kaba heh ha ka jylla Meghalaya ruh” la ong u Antony haba ïakren bad ki nongthoh khubor.
Ula kdew ba ka seng kala nang kiew bha ha ka thaiñ ha kine ki snem kiba la dep. “Ha ki snem kiba la dep, ha kylleng jong ka thaiñ shatei lam mihngi, ka BJP ka la nang pynïar ïa ki dienjat ki jongka. Bun snem mynshwa ha ka thaiñ shatei lam mihgni, ka seng kam shym la don wat tang shi ‘Seat’ ruh. Mynta ha ki 7 ne 8 tylli ki jylla ka dei kaba la synshar da ka NDA kynthup hapoh ka Meghalaya,” ula ong.
“Ha ki 4 tylli ki jylla, ka BJP ka dei ka seng kaba heh paid tam ha Assam, Arunachal Pradesh, Manipur bad Tripura bad ha kiwei pat ki jylla, ka seng ka la nang pynïar ïa la ki dienjat. Kumta phin sa ïohi ba ka seng kan sa nang ïar bad kan sa ïoh shuh shuh ïa ki nongmihkhmat hangne” la bynrap u Antony.
Halor ki jingangnud jong ka seng hapoh ka jylla, “Kumba long ha kiwei pat ki jylla, ka seng ka don ïa ka jingangnud ban long kaba wan nyngkong ha Meghalaya ruh.”
Halor ka jingpynkynriah ïa ka election jongka Garo Hills Autonomous District Council (GHADC), u Antony ula ong, ba ka BJP ka dei kaba la pynkhreh bad la khmih lynti ba kan leh bha ha ka jingjop ki kyrtong.
“Ngi long kiba skhem jingmut. Ka election ADC ha Garo Hills la dep ban pynkynriah hynrei ka BJP ka dei kaba la pynkhreh pura ïa ka election hashwa ba kin mih ki jingjia ki bym lah ban mutdur. Ngi dei ka seng kaba nyngkong ban ïa kiwei pat ki seng, ha ka jingpynbna ïa ka kyrteng jong ki kyrtong ban ïakhun ïa ka elekshon” ula ong.
“Na ki 29 tylli ki Seat, jan baroh ki Seat (lait noh) ha ki 3 ne 4 tylli kiba ngi lah dep ban pynbna ïa ki kyrtong bad ki kyrtong kila trei ha madan. Ha ka por kaba la dep, ngi lah ïoh tang 2 Seat hangne. Mynta ka kynti, ngi ngin kiew bha ha ka jinglehbha ka jong ngi” la ong u Antony.
