Kyntu u Archbishop ïaki Rangbah ban shakri hok ïa u Blei, ka Balang bad imlang sahlang

Nongpoh, Ïaiong 19: Ka jingïakynduh lang jong ki Rangbah Balang Katholik ka la long kaba iphuh iphieng bad kaba shongkun shisha, ha kaba hajar ngut ki riewngeit Katholik na ki 8 tylli ki zone kiba hap hapoh ka Shillong Archdiocese ki la wan ban ïa shim bynta ha ka jingïalang kaba la tip kum ka XVII Annual Meet jong ka Synjuk ki Seng Rangbah Katholik Shillong Archdiocese, kaba la pynlong da ka Assumption Church Parish Nongpoh, kaba hap hapoh ka Zone VI.
Ha kane ka jingïalang, ki riewngeit na jan bad na jngai ki la wan ban sakhi lang, ha kaba u Archbishop ka Shillong Archdiocese, u Most Rev. Victor Lyngdoh, u la shim ïaka bynta ban kñia ïaka mass bakhuid.
Ïa kane ka jingïalang kaba arsngi, ha ki 18 bad 19 tarik Ïaiong, la pynlong halor ka phang pdeng: “To ngin ym sngewthait ban leh ïa kaba bha, lada ngim leh swai, ha ka por kaba biang ngin sa ïoh ïa ka bainong” (na ka kitab Galatia 6:9).
Nalor u Archbishop Victor Lyngdoh, la ïadonlang ruh u Bishop Synrop ka Shillong Archdiocese, u Most Rev. Bernard Laloo, u Parish Priest ka Nongpoh Parish, u Fr. Peter Syiemlieh, u Spiritual Director, u Fr. Andreas Pariat, ryngkat ki Sister, ki Brother, ki nongïalam jong ki zone bapher bapher, bad kumjuh ruh ki riew saiñ pyrthei bapher bapher.
Haba kren ha kane ka jingïalang, u Archbishop Most. Rev. Victor Lyngdoh u la pynkynmaw ba ki Rangbah ki dei ki nongïalam jong ka Balang bad kumjuh ruh ki nongshong shnong kiba don ka bynta kaba khraw ha ka imlang ka sahlang. U la ong ruh ba lada ki Rangbah ki tlot ne kim ïaid beit, kan ktah beit ïa ka imlang ka sahlang baroh kawei.
U la kdew ruh ba kum ki Rangbah, ki dei ban long ki briew kiba don ka burom, kiba tip akor naduh ka bam, ka dih, ka riam, ka beit, bad kiba don ka jingtip ïa u Blei bad ïa u briew. Lada ki Rangbah ki long kiba ryntih, kiwei ruh kin burom ïa ki bad bud ïa ka nuksa kaba bha jong ki.
Shuh shuh, u Archbishop u la ong ba ïa ki Rangbah la khot ban shakri, ban shakri ïa u Blei, ïa ka Balang, ïa ka imlang ka sahlang bad ïa ka iing ka sem. Kumta, ki dei ban long kiba trei shitom bad kiba shlur ban ïeng na ka bynta ka jingshisha bad ban ai ka jingshakri kaba hok bad kaba bha.
Ha kajuh ka por, u la kyntu ïa ki Rangbah ba kin ïai bteng ban leh ïa ki kam kiba bha bad ban pynphriang ïa ki kam babha sha ka imlang ka sahlang, khnang ba kin long ka nuksa kaba shai ba ki dei ki nongbud jong u Jisu Khrist. U la maham ruh ba ym dei ban sngewthait ha ka jingleh bha, namar lada sangeh, ki kam sniew kin sa shim kabu ban synshar.