Dei ban don ka bhah ïa ki samla ha ki elekshon ADC, Assembly bad Parliament, ong ka NCP

By Mawphor Editor On Apr 20, 2026

Shillong, Ïaïong 19: Kum ka jingpyrshang ban pynkhlaiñ biang ïa la ka jong ka nongrim ha Meghalaya, ka Nationalist Congress Party (NCP) ka la phai khmat mynta sha ki jingeh jong ka jingkyrduh kam kyrduh jam da kaba ai ka jingkyrshan ïa ka jingdonkam ka bhah jong ki samla ha ki elekshon ki Autonomous District Council (ADC).
U National President jong ka Nationalist Youth Congress (NYC), youth wing jong ka NCP, u Dheeraj Sharma uba don ha ka jylla na ka bynta ban wanrah ka jingkylla ha ka saiñ pyrthei u la khot ïa baroh ban phai khmat sha ka jingkyrduh kam bad ki jingkhim palat jong ki lad ki lynti.
U Sharma haba kren sha ki lad pathai khubor u la ong ba ka jingduna ka jingïoh lad ha ka kam saiñ pyrthei ka la ieh shadien ïa ki samla ba kin ym ïoh ka lad ban pynpaw ka sur halor ki jingshim rai, bad ka la pynlong ruh ïa ki ban hap leit trei bad bylla shabar na la ka jong ka jylla Meghalaya. “Ka jingkhlaiñ bad ka jingïoh lad kaba bun jong ki samla ban don bynta lang ha ka jingshim ïa ki rai kan ïarap ïa ki ban kyntiew lang ïa ka jylla,” u la ong, da kaba pynïasoh ïa ka jingdawa ka bhah kam kaba wanrah sha ka jingbym ïohkam hapdeng ki samla.
U la ong ba ka NCP kan sa ïakren ïa kane ka kam bad ki nongïalam ka sengkmie kum shi bynta ban khynñiat ïa ka jingai bor ïa ki samla ban long ki nongmihkhmat ha ki elekshon ki ADC, ha Assembly, bad Parliament.
Haba kdew ïa ka jingïaid lynti jong ka party ban kyntiew ïa ki samla ban long ki nongïalam, u Sharma u la ong ba ka jingdon bhah ha ki ADC kan wanrah ïa ka nongrim kaba thymmai ha ki kam shakri bad kumjuh kan ïarap ban pynbeit ïa ka jingduna kiba mihkhmat ha kine ki jaka treikam.
U Sharma u la ong ba ka NCP ka don ka jingangnud ban pynïar ïa ki kam sha lyndet ym tang ka bhah kam bhah jam naba ka thmu ban thaw ïa ki lad treikam na ka bynta ki samla ban long ki nongïalam ha ki ADC, ha assembly, bad parliament.
Kane ka jingkhot ka jingdonkam ïa ka bhah ka wan hadien ba ka NCP ka la sdang ban pynlong ïa ka jingpynrung dkhot kaba thmu ruh ban pynkhlaiñ lyngba ki samla ki ban long ka nongrim ha ka jylla.
U la bynrap da kaba ong ba ka party ka sdang ban pynkhlaiñ bad pynïar ïa ka nongrim jong ki samla lyngba ki seng bad ka jingpynrung dkhot bad kumjuh ruh ka jingai lad kaba bun bha ïa ka jingïashim bynta ba shitrhem jong ki samla ha ki elekshon.