Lada pyrshah ïa ka projek kam jngohkai ha Lumpongdeng ai noh sha Wahiajer ong u ma Sniawbhalang

Shillong, Iaiong 19: U Symbud Myntri Rangbah bad MLA ka Nartiang constituency u Bah Sniawbhalang Dhar, u la ong ba ka Wahiajer kan pdiang sngewbha ïa project ka tnat Tourism ha dewlynnong Lumpongdeng lada ki nongïakhih ki dang ïai bteng ban pyrshah.
U Bah Sniawbhalang ula ong ba haka jingsynshar paidbah, ka riti synshar ka ailad ïa ka jingshah thngan na ka bynta ki Project ne ban pyrshah ïa ki project jong ka roi ka par.
Haba ïadei bad ka jingshah thngan kaba dang ïaid shakhmat jong ka Green Tech Foundation kaba dawa ban pyndam noh ïa ka project ha Lumpongdeng, u Bah Sniawbhalang ula ong “Hynrei ki don ki briew kiba pynlong ïa ka jingshah thngan ban khanglad ïaka project. Nga la ong ïa u Myntri Rangbah ka Jylla, lada ki kyntait ïa kum kane ka project, dei ban rah noh sha Wahiajer, ngi sngewkmen ban pdiang sngewbha ïa ka.”
“Don kiba pynlong ia ka jingshah thngan ban ïoh ïa ka roi ka par, bad don ruh kiba pynlong ïa ka jingshah thngan ban kyntait ïa ka roi ka par. Kata ka dei ka synshar paidbah”, u la bynrap” ula ong.