Pan jingpynshai ka ïingkashari High Court na ka NHAI halor ki kontraktor ba pyntrei ïa ka surok Jowai-Ratacherra

Shillong, Iaiong 17 : Ka ïing Bishar High Court jongka jylla ka la bthah ïa ka National Highways Authority of India (NHAI) ban ai jingtip halor ki kontraktor kiba la ai ban pyntrei ïa ka surok na Jowai sha Ratacherra hadien ba u nongujor Amicus Curiae u la pyntip ba ïa kajuh ka kam la ai sa ha uwei u kontraktor ba lai.
Haba bishar ïa ka mukotruma ka Division Bench ba la khlieh da ka Chief Justice Revati Mohite Dere bad u Justice W Diengdoh ki la buh jingthoh ïa ka affidavit ba thymmai ba la ai da u Project Director ka NHAI u Anand Singh Chauhan ha ka 15 tarik Iaiong 2026.
Ha katei ka affidavit nalor ba la pan map halor ka jingbakla ban ai ïa ka kaiphod kaba mynshwa la suh lang ruh ïa ka dur ha kaba la pyni ïa ka jingtrei ka dang ïaid.
U Amicus Curiae u S Panthi u la ïathuh ïa ka ïing bishar ba la thung sa u kontraktor ba lai ban leh ïa katei ka juh ka kam wat la dep pynshai mynshwa ba ki don arngut ki kontraktor kiba trei ïa katei ka juh ka bynta.
Namar la pynlut ïa katei ka kam da ka pisa u paidbah bad khamtam hadien ba u Amicus Curiae u la pyntip ba don sa uwei u kontraktor la bthah ïa ka NHAI ba kan ai ïa ki kyrteng jong kitei ki lai ngut ki kontraktor kiba pyntrei ïa katei ka surok naduh Jowai shaduh Ratacherra khnang ban pynshisha ïa katei ka kam ba la ai ha kitei ki kontraktor.
Nalor kata u Nongïasaid u la pyntip hato la leh ei ei ne em ïa ki kontraktor ba ki khlem lah ban pyndep ïa ka kam kat kum ka jingkwah jong ki bor pynïaid.
La buh ban shong bishar biang ïa kane ka mukotduma ha ka 14 tarik Jymmang 2026.